IGNOU-in Digital Learning Centre 5,000 din tum

Indira Gandhi Natio­nal Open University (IGNOU) chuan ram pum­ah digital learning centre 5,000 din an tum thu kar kalta Inrini khan a tarlang.

IGNOU Vice-Chan­cellor, Ravindra Kumar chuan digital learning centre din tur hian ruahmanna hrang hrang an siam thu a sawi a, hemi atan hian ram chhunga thingtlang khua nuai 10 chuangah broadband connection pawh tihfel a ni, a ti. Hmarchhak tan educational programme duan a nih thu sawiin, hei hi state hrang hrangah kalpui a ni dawn a, North East Council of IGNOU Regional Centres (NECIRC) pawh din a ni tawh, a ti. Hei hian kawng tam takah zirlaite ṭan kawng a hawng dawn a, zirlai tam zawkin zirna an zawm theih phah a beisei thu a sawi bawk.

Vice Chancellor Kumar chuan, IGNOU chuan Ministry of Infor­mation Technolo­gy-a National e-governance division-te thawhpui turin inremna a ziahpui tawh tih sawiin, hei hi Digital India hmalakna peng pakhat a ni a, kawng hrang hrangin hma lak zel a nih tur thu a sawi. Digital learning centre hian mi tam tak tan kawng a hawng dawn a, a bik takin hmarchhak mipuiten ṭangkai takin an hmang thei dawn niin IGNOU Vice-Chancellor, Ravindra Kumar chuan a sawi bawk.