Congress party-in Tuilian ṭanpuina tam zawk pek phut

Congress party chuan Assam-a tuilian ṭanpuina tura sum ruahman chu tlem an tih thu an sawi a, sum tam zawk pe turin BJP kaihhruai NDA sorkar an phut tih an sawi.

Sorkar laipui chuan hmarchhak state - Assam, Arunachal Pra­desh, Nagaland, Mani­pur leh Mizoram-a chhiatna hrang hrang tuarte chhawmdawlna turin cheng vaibelchhe 2,000 a ruahman a, hei hi Prime Minister Narendra Modi-a'n Assam a tlawh ṭumin puan a ni. Hetih lai hian Congress party chuan chhawmdawlna hi a beitham hle niin an sawi a, a bik takin tuilian avanga harsatna nasa tak tawk Assam state tan chuan intundin lehna tham a tling lo niin an sawi. Hetih rual hian Assam sorkar hnenah ṭanpuina sum cheng vaieblchhe 3,888 tal pe turin PM Modi an phut tih an sawi.

Party official-te chuan Modi-a chu hmarchhak mite harsatna hrethiam tawk loah puhin, a chawr chhuahna Gujarat state ngaipawimawh bikah an puh bawk. Gujarat state tan Modi hian cheng vaibelchhe 2,000 a ruahman sak nia sawiin, hetih laia hmarchhak state panga tana cheng vaibelchhe 2,000 tho ruahman a ni chu beitham an tih thu an sawi a ni.

Assam Congress MP Bhubaneswar Kalita chuan District 29-a khaw 4,084 chu tuilianin a chim tih a sawi a, mi 25,42,000 velin harsatna an tawk a ni. Harsatna thleng hi a namai lo hle a, heti chung hian Prime Minister chuan Assam tlawh loin hun rei tak a awm a, tuilianin ziaawm lam a pan tawh hnuah a che chhuak ve chauh niin a sawi a, a dem thu a sawi.