Assam sorkarin ABMSU president thihdan CBI chhui tir dawn

Assam sorkar chuan All Bodo Minority Students Union (ABMSU) president Lafikul Islam thah a nih dan chu chhui turin Special Investigation Team (SIT) a ko lut dawn.

Chief Minister Sarbananda Sonowal chuan ABMSU president thihna hi chhui chhuah ngei a duh tih sawiin, hemi chhui tur hian CBI kohluh an ni dawn tih a puang. Hemi chungchang ngaihtuah hian Ningani khana ABMSU, All Assam Minorities Students Union (AAMSU) leh Bodoland People’s Front (BPF) aiawhte chuan, Brahmaputra State Guest House-ah meeting an nei a, CBI kohluh hi an remti a ni. Hetih rual hian Lafikul Islam-a chhungte hnenah state sorkar chuan cheng nuai nga pek a remti a, hliam tuar Subhankar Chakraborty hneah cheng 50,000 pek a remti bawk.

All Bodo Minority Students Union (ABMSU) president Lafikul Islam hi tunkar Thawhlehni khan mi tu tih hriat lohten an kaphlum a, tun thlengin pawikhawihtute hi man an la ni lo. Mita hmutute chuan bike-a chuang mi pahnihte chuan Lafikul Islam hi an kap niin an sawi. He thil thlengah hian ABMSU-te chu an lawm lo hle a, pawikhawihtu chu zawnchhuah a, dan anga na taka hrem an phut thu an sawi a ni. An thil phut hi a hlawhtling lo a nih chuan na zawka hmalak an tum thu leh, a ṭul a nih chuan bandh pawh huaihawt a nih tur thu an sawi.

Chief Minister Mukul Sanga chuan he ABMSU hruaitu thah a ni chu a dem thu a sawi a, pawikhawihtute man chhuak turin theihtawp chhuah a nih tur thu a sawi. Hetih rual hian mipuite chu chiai lo tura ngenin, pawl hrang hrangte chu boruak duhawm loh chawk chhuak zawnga hma la lo turin a ngen bawk. Assam Police Director General Mukesh Sahay pawhin he thil thlenga mawhphurtute chu zawn chhuah ngei an nih tur thu a sawi ve bawk.