West Tripura-a thingpui huanah bomb pali a puak

West Tripura district-a Sekerkote tea garden huam chhungah Thawhlehni zan khan ṭum li bomb a puak.

Bomb hmasa ber hi Bikramgar Tehsilder office bula chenna in bul gate-ah a puak a, a pahnihna hi in aṭanga hla vak loah a puak leh bawk. Bomb pathumna leh palina hi Sekerkote area-a New Market leh Motor Stand-ah tihpuah an ni leh a ni.

Bomb puak hi a na hle a, km 4-5 vela hla aṭang pawhin a thawm hi a hriat a ni. Vanneihthlak takin thi leh hliam erawh an awm lo thung.

Sekerkote area hi state khawpui, Agartala aṭanga km 14 vela hla a ni. Agartala khawpuiah hian kum 2008 khan minute 45 chhung bomb panga tihpuah a lo ni tawh a, mi pali an thih bakah mi tam takin hliam an tuar bawk.

Amtali police station official chuan Sekerkote-a bomb puak vang hian mi 12 lakah thubuai ziahluh a ni tih sawiin, chhui chian mek a nih tih a sawi. Man erawh an la nei lo.