Ram kil khatah Chakma-te'n min chîmral zo ta tih a lang chiang hle - MPC President

MPC president Lalhmangaiha Sailo chuan, vai hoin Mizote an chîmral thei tura ngaih a nih laiin, Mizoram khawthlang lam aṭangin inchîmralna thli chak takin a tleh mek niin a sawi a, "Mizo hi kan ram kil khatah chuan Chakma-te'n min chîmral zo ta tih hi a lang chiang hle," a ti.

Nimina MPC party pisaah inkhawmah thu sawiin Lalhmangaiha chuan, tunlai chanchinbua chanchin thar chhuak lâr leh zing ber chu Chakma chungchang a ni tih a sawi a; "Mizote'n Chakma kan lo ngaimawh hle a ni tih a hriat theih. Kan ngaimawhna chhan nia lang chu, duh aiin kan ramah an tam ta lutuk hi a ni," tiin, chu chuan nghawng thui leh thûk tak a neih thu a sawi.

PC dintu Brig. T Sailo-in ual au takin national newspaper lârah August 22, 1986 khan 'Chakma constitute a real danger to us' tia a puan thu sawiin Lalhmangaiha Sailo chuan, "Kum 31 hnuah pawh kha thil hlauhawm kha kiam loin, zual zawkin a kai chho a, vawiina Mizoram demographic composition sawi nghîng nasa bertu an ni a, Mizorama mihring awm zat aṭanga 2% vel chu Chakma an ni ta," a ti.

MPC President chuan, Chakma chung­chang ngaimawhawm tak a lo nih tâk chhan pakhat chu, political party ṭhenkhatin vote bank politics an khelh vang a ni tih a sawi a, "Chakma problem kan tih hian foreigner issue, illegal migrant issue a inthlung tlat a ni a, hma kan lak a ngai," a ti a; sorkarna chelh mektu leh la chelh zel turte'n Chakma vanga harsatna sutkian hna chu mutmawh hnàrmawha an neih a ngaih thu a sawi.

Lalhmangaiha Sailo chuan, MPC party-te chu hnamah an chiang nia sawiin, "Kan ram leh hnam humhalh kawnga tun hma aṭanga ke kan pên tawh ṭhinte chhunzawm zel turin theihtawp chhuahin hma kan la zel dawn," a ti a; chu chu an hlawhtling theih nan mipuite thawhpuiah a sáwm a ni.