Tripura : TMC MLA parukin BJP an zawm

Tripura-a Trinamool Congress (TMC) MLA parukte chuan Thawhṭanni khan Bharatiya Janata Party (BJP) an zawm.

TMC MLA-te lawmluhna inkhawm buatsaih chu Union Petroleum and Natural Gas Minister Dharmendra Pradhan bakah, Assam Finance Minister Himanta Biswa Sarma, BJP Tripura in-charge Sunil Deodhar leh state BJP president Biplab Deb-te'n an hmanpui a ni. MLA paruk - Sudip Roy Barman, Ashish Kumar Saha, Diba Chandra Hrangkhawl, Biswa Bandhu Sen, Pranjit Singh Roy leh Dilip Sarkar-te hian BJP an zawm hma, kar kalta Inrinni khan BJP national president Amit Shah chu Delhi-ah an hmu a, Thawhṭanni khan BJP-ah lawmluh an ni ta ni.

TMC MLA-te hian India president thlannaah khan BJP kaihhruai National Democratic Alliance (NDA) candidate Ram Nath Kovind chu an vote a, hei vang hian party aṭanga hnawhchhuah an ni. West Bengal chief minister leh Trinamool Congress hruaitu ni bawk Mamata Banerjee chuan an MLA te hi party kalha an chet avangin ban an nih thu a lo sawi tawh a ni. MLA-te hian president thlan hma hian Ram Nath Kovind an thlawp tur thu leh, Congress kaihhruai party hrang hrangte candidate inṭawm Meira Kumar an thlawp loh tur thu ualau takin an lo sawi tawh a ni.

Union Minister Dharmendra Pradhan chuan TMC MLA-te'n an party an zawm thei ta chu lawm awm a tih thu a sawi a, hetih rual hian Congress MLA zingah BJP zawm tum an la awm thu a sawi. Tripura-ah hian an party chuan huang an zauh zel dawn tih sawiin, nakkuma State Assembly Election neih hunah pawh hnehna chan an inbeisei thu leh, Chief Minister atan pawh BJP mi leh sa ngei an awm a beisei thu a sawi. He thu hi Agartala-a thuthar thehdarhtute hmaah a sawi a, BJP chuan nasa taka hman an sawn thu uar takin a sawi a ni. Minister chuan Tripura-ah an party chuan seat an la la ngai lo tih sawiin, tuna TMC MLA-te'n BJP an zawm hi an bulṭanna tur a nih thu a sawi. State mipuiten Communist Party of India - Marxist (CPI-M) sorkarah beiseina an nei sang tawh lo nia sawiin, Chief Minister Manik Sarkar-a pawh a dinhmun a ṭha tawh lo hle niin a sawi bawk.

Tripura Assembly-ah hian seat 60 a awm mek a, CPI-M chuan party malin seat 50 an nei a ni. Left Front sorkar chuan kum 24 chhung thuneihna an chang tawh a, hetih lai hian BJP chuan MLA an la nei ngai lo. Mahse TMC MLA paruk-te'n BJP an zawm tak avangin a vawi khat nan BJP chuan assembly-ah seat an nei ve ta a ni. Hei mai hi a ni lo a, kum 2016 hma lam kha chuan hmarchhak state-ah BJP-in sorkarna an la chang ngai lo. Central-a BJP kaihhruai NDA sorkar a din hnuah erawh BJP-in hmarchhakah huang an zauh chak hle a, kum 2016 khan a vawikhatna atan Assam-ah BJP kaihhruai sorkar a ding a, kuminah Manipur leh Arunachal Pardesh-ahte sorkarna an siam leh bawk.