Manipur Governor-in ‘Flying Doctor’ scheme ṭha ti

Manipur Governor Najma Heptulla chuan hmun kilkhawr leh pan harsa zawkten awlsam zawka doctor an rawn theihna tura duan ‘flying doctor’ scheme chu ṭha a tih thu sawiin, a thlawp thu a sawi.

Heptulla hian tunhnai khan New Delhi-ah Prime Minister Narendra Modi chu hmuin, ‘flying doctor’ scheme chung­chang hi a sawipui a ni. Heptulla chuan he scheme hi hmar­chhak mipuite tan a ṭang­kai hle dawn tih sawiin, a bikin inkalpawhna leh inbiak pawhna ṭhat lohna hmunahte a ṭangkai hle dawn a ni, a ti. Hmarchhak chu tlangram chhengchhe tak a nih avangin kawng tam takah harsatna a awm tih sawiin, a bikin inkalpawhna kawngah harsatna a thlen nasat thu a sawi. Hemi a nih avang hian hmun hla tak tak, tlawhpawh zung zung theih lohna hmuna chengte tan ‘flying doctor’ scheme hi a ṭha hle dawn a ni,a ti.

Manipur Governor chuan he scheme hi a taka kalpui thuai a nih theih nana hma lakpui turin Modi chu a sawm a, hmarchhak mipuite harsana tawh mek chinfel thuai a nih theih nana thawhpuiah a sawm a ni. Heptulla hian North Eastern Council-ah tun hnai khan Manipur-a flying doctor scheme kalpui tur chungchang hi a thlen a, cheng vaibelchhe 25 an mamawh tur thu a sawi. Manipur chuan tunhnai kum 20 chhunga tuilian nasa ber a tawk tih sawiin, hri leng a tam a, hei vang hian he scheme hi a taka kalpui thuai a ṭul a ni, a ti. Manipur-ah hian Japanese Encephalitis leh dengue vei hmuhchuah thar eng emaw zat an awm a, state sorkar pawh a buai hle a ni. Chief minister chuan hri leng chungchangah hian emergency meeting pawh a lo ko tawh a ni.