Social media-a thlalak post vangin zirtirtu man

Assam-a private high school zirtirtu Faizuddin Laskar chu social media-a a thlalak post avangin man a ni.

Faizuddin Laskar hi Hailakandi district-a cheng a ni a, tun hnai khan class room-a zirlai pakhat a kuah lai thlalak chu social media-ah a darh vak a ni. Police-te chuan zirtirtu hi Protection of Children from Sexual Offences (POCSO)Act, Section 8, Indian Penal Code Section 192, Information Techenology Act 2000 tlawhchhanin an man a ni. Hailakandi SP Pranab Jyoti Goswami chuan he thlalak hi zirlai pakhatin a laksak a nih thu a sawi.

Zirtirtu Faizuddin chuan a zirlai nen hian inneih an duh a, mahse a nu leh pa ten an remti lo a, midang pasalah neih tir an tum niin a sawi. Nupuiah neih ngei a duh avang leh, inneih hi an ṭhulh ngei theihna turin he thlalak hi a post ta tih a sawi. Thlalak hi thla 10 liam ta vela an lak a nih tawh thu sawiin, hetih hun lai hian zirlai hmechhia hi pawl 10 a zir mek thu a sawi. A nu leh pate chuan kum 18 a tling tawh tiin, pasal nei turin an ti a, mahse chu chu a thlen loh nan kawng dang a dap ta tih a sawi.

Hetih lai hian police-te chuan he zirtirtu pa hian zirlai naupang hi kum a tlin hmain mipat hmeichhiatna a lo hmanpui tawh ṭhin tih an sawi. Hei hi tun hnaia social media-a a darh vak hnua an zirchian hnuah hriatchhuah chauh a nih thu an sawi bawk.