Nagaland CM-in MLA 10 lakah petition thehlut nawn leh

Nagaland Chief Minister TR Zeliang chuan Naga Peoples Front (NPF) MLA 10-te disqualify an nih theih nan Thawhṭanni khan Assembly seaker Imtiwapang Aier lakah petition a thehlut nawn leh. Chief Minister hian kar kalta Zirtawpni khan heng MLA te lakah hian petition hi a lo thehlut tawh bawk a ni.

Zeliang chuan July 21-a floor test a hmachhawn ṭum khan NPF MLA 10-te hian an thlawp lo niin a sawi a, party dan kalha an chet avangin disqualify turin hma a la zui ta ni. Heng MLA-te hian ram danpui, Tenth Schedule paragraph 2(1)(b) an bawhchhia nia sawiin an lakah hian petition hi a thehlut a ni. Hei bakah hian emergency session-ah an tel lo bawk niin a sawi. Zeliang hian floor test paltlang tur hian NPF MLA 46 zinga 36 thlawpna a hmu a, BJP (4) leh Independent MLA pasarih-te'n an thlawp bawk. NFP MLA 10-in an thlawp loh avang hian chief minister hi a lawm lo hle nia sawi a ni a, disqualify thuai turin speaker pawh a kar na hle tih tarlan a ni.

NPF MLA 10-te hian chief minsiter aṭanga paihthlak tak Shurhozelie Liezietsu an thlawp a ni. Shurhozelie Liezietsu-a kaihhruai NPF hian tun hnaiah buaina an tawk nasa hle a, an chinfel mai a la rinawm loh bawk. Chief minister T.R Zeliang-a chu party thila inhnamhnawih thei lo turin kum ruk chhung atan hrem a ni a, a ni bakah hian MLA eng emaw zat chu suspend an ni. NPF-in an party dankalha chea puha a hrem mekte hi mi 30 vel an ni.