Jail tang mek, Meghalaya BJP hruaitu thubuai dangah man nawn leh

Meghalaya BJP vice president Bernard N Marak chu a farmhouse-a nawhchizawrhna hmun siamah leh thubuai dang pakhatah jail-a khung a nih tawh hnuah, thubuai dang a neihah a ṭum thumna atan man a ni leh.

Hel hruaitu hlui, Marak hi inbumna hmang leh midangte sum dil luia puhna thubuai siambelh sak leh a ni. Nilaini khan police-ten man nawn lehin, West Garo Hills district court chuan ni nga chhung police custody-ah awm turin a ti.

West Garo Hills Superintendent of Police Vivekanand Singh chuan BJP hruaitu hi sumdawngte hnen aṭanga pawisa phut chungchanga inhnamhnawiha puh a ni. IPSC section hnuaiah thubuai hi siamsak a ni.

West Garo Hills district-a a farmhouse-a nawhchizawrhna hmun siama puh chungchangah July 29 khan Uttar Pradesh-ah Marak hi man a ni a, Meghalaya lamah hruai kir a ni. August 10 khan Explosive Substances Act hnuaiah man nawn leh niin, a farmhouse aṭang hian puakthei thil - gelatine tlawn 35, detonator 100, leh thal pali man a ni tih police-te chuan an sawi. July 22 khan a farmhouse aṭang hian kum tling lo paruk chhanchhuah an ni a, an dap laia awm mi 73-te chu police-ten manin, an car leh zu leh condom ṭhahnem tak an man tel bawk.

Marak hi helpawl tihtawp tawh, Achik National Volunteer Council (B) chairman a ni ṭhin a, mahse an pawl tihtawp a nih hnuah BJP a zawm a ni. Tura aṭangin Garo Hills Autonomous District Council member-ah thlan a ni.