Punjab-a biak-in suasam a nih chungchangah Nagaland RPP-in Punjab CM hnenah ngenna thlen

Punjab-a Tarn Taran district-a Kristian biak-in suasam leh, pastor car halsak a nih chungchangah Nagaland-a Rising People's Party (RPP) chuan Punjab chief minister Bhagwant Mann hnenah lehkha thawnin, pawikhawihtute chu a rang thei anga man chhuak ngei turin an ngen.

August 30 khan misual ṭhenkhatin Tarn Taran district-a biak-in hi suasamin, biak-in chhunga Isua leh Mari lim dahte an tichhia a, pastor car an halsak bawk.

RPP president Joel Naga chuan he thil thleng hi a pawi a tih thu sawiin, misual ṭhenkhatin sakhaw inkara inhuatna thleng thei zawng leh, sakhaw zalenna palzuta pawikhawihna an thlen chu ṭha lo a tih thu a sawi.

Punjab CM Mann-a'n pawikhawihna thleng a dem leh, an state mipuite inkara inunauna ṭha tak awm tihchhiat an phal ngai dawn lo tia a sawi chu lawmawm an tih thu RPP chuan an sawi bawk.

India ramah Kristiante beihna a thlen fo karah, India ram tana beiseina thlentu AAP chu Kristiante leh sakhaw tlem zawkte humhalhna kawnga hma hruaitu an nih zui zel an beisei thu RPP chuan an tarlang.