Assam tuilian vanga thi Mi 110 an tling tawh
Assam-a tuilian chu district 24-a mi nuai 24 chuangin an tuar mek a, tuilian vanga thi hi mi 110 an tling tawh bawk.
Assam State Disaster Management Authority (ASDMA) in report a tihchhuahah state chhunga tuilian hian thingtlang khaw 2,254 a chim tawh niin a tarlang. Thlai chinna ram hectare 1,09,600.53-a zau a chhe tawh bawk.
ASDMA report-a a lan danin tuilian tuarte hi Dhemaji, Lakhimpur, Biswanath, Darrang, Baksa, Nalbari, Barpeta, Chirang, Bongaigaon, Kokrajhar, Dhubri, South Salmara, Goalpara, Kamrup, Kamrup Metropolitan, Morigaon, Nagaon, Golaghat, Jorhat, Majuli, Sivasagar, Dibrugarh, Tinsukia leh Cachar district-te an ni.
Sorkar chuan tuilian tuarte awmna tur hian relief camp 276 leh relief distribution centre 192 a siam tawh bawk. Goalpara district chu tuilian tuar nasa ber a ni a, mi nuai 4.59 velin tuilian hi an tuar a, Barpeta-ah mi nuai 3.37 leh Morigaon-ah mi nuai 3.35 velin harsatna an tawk mek a ni. Kaziranga National Park-ah ramsa 113 chu tuliain vangin an thi tawh a, ramsa 140 chhanchhuah an ni tawh bawk.
Chief minister Sarbananda Sonowal chuan Thawhṭanni zan khan Nalbari district-a Pokhura khuaa tui lenna hmun a tlawh a, tualchhung thuneitute a kawm nghal a ni. CM chuan harsatna an tawrh meknaah sorkar laipui lamin a puih avangin prime minister Narendra Modi hnenah lawmthu a sawi.