ANCSU in zirlaite himna dah pawimawh turin ngen

All Nagaland College Students’ Union (ANCSU) chuan University Grants Commission (UGC) guideline tihchhuahin September thla chhunga course hrang hranga end semester examination nei fel vek tura a tih chu ṭha an tih loh thu an tarlang.

 

Chief secretary hnena lehkha an thawnah, ANCSU chuan UGC leh ministry of human resource development hnenah guideline a siam chu Nagaland chungchang bikah ngaihtuah ṭha tura ngen turin state sorkar an duh thu an thlen. Nagaland University chu an state chhunga dinhmun azirin a ṭul dan anga thutlukna siam phalsak tura an duh thu an sawi a ni. 

Exam buatsaih chu thil pawimawh tak a nih rualin, zirna avanga zirlaite nunna dinhmun derthawnga dah chu thil awmze nei lo nia an ngaih thu zirlai pawl chuan a sawi. UGC chuan hripui leng mek chungchanga ram chhung dinhmunte chu a ngaihtuah tel vek a ngai a, hetih laia exam buatsaih tura hriattirna a tihchhuah chu thil pawmawm loh tak a ni, an ti. 

Nagaland University-in July 16, 2020-a course hrang hranga atana exam routine a lo tihchhuah tawh chu sut leh vek tura an phut thu an sawi a, exam buatsaih chungchanga thutlukna an siam hmain state sorkar leh Nagaland University chuan college leh university zirlaite himna chu dah pawimawh phawt se an duh thu an tarlang.