Guwahati-a Mahatma Gandhi lim sawn tumna duh lo

Assam-a Kamrup (Metro) district thuneitute chuan Mahatma Gandhi lim chu Guwahati-a Gandhi mondop-ah sawn an tum a, hei hi mi tam takin duh lohin lungawi lohna an lantir.

Mahatma Gandhi lim awmna sawn chungchangah hian Thawhṭanni khan Kamrup (Metro) Deputy Commissioner (DC) M Angamuthu kaihhruaiin meeting neih a ni. DC M Angamuthu chuan Guwahati Smart City project hnuaia Gandhi Mondop tihchangtlunna tura hmalak meknaah Mahatma Gandhi lim chu Sarania Hill-ah sawn hi ṭha an tih thu a sawi a, hei hi meeting pawhin a pawm a ni, a ti. Mahse he thutlukna hi mi tam tak chuan duh loin lungawi lohna an lantir a ni.

Heritage Conservation Society president Manik Bora chuan, "Gan­dhi-a lim hi kum 47 liamta khan siam a ni a, Assam mawina belh­chhahtu leh, state rohlu a ni a, khawih chet hi kan remti lo a ni. Dahsawm a ni emaw, khawi chet a nih hrim hrim emaw chuan a vanduai thlak hle ang" a ti. District thuneituten dahsawn tura thutlukna an siam chu a dem thu sawiin, hei hi a tawp thlenga an do tur thu a sawi. Assam Freedom Fighters Association president Jatin Goswami pawhin thutlukna chu a dem thu a sawi a, Gandhi-a chu an state mawina leh zahawmna vawngtu a nih thu a sawi. Sawn tumna reng reng chu an do tlat tur thu a sawi a, an pawl chuan hemi chungchangah hian state sorkarah memorandum theh luh an tum thu a sawi bawk.

Kasturba Gandhi National Memorial Trust, Assam Branch pawhin thuchhuah siamin, Sarania Hill-a Gandhi mondop tihchangtlunna atana Gandhia lim dah tumna chu an thlawp loh thu leh, an dem zawk thu an sawi. Hemi chungchang hian district thuneitute hnenah detailed papers thehluh an tum thu an sawi. Kasturba Gandhi National Memorial Trust official-te chuan Gandhi-a lim hi Congress sorkar hun lai, Prime Minister hlui Indira Gandhi kaihhruai hun laia din a ni an ti a, hei hi BJP chuan duh loin khawih chet an tum ta niin an tarlang bawk.

All Assam Visual Artists Asso­ciation pawhin Kamrup (Metro) district thutlukna hi an dem thu an sawi a, artist-te chuan a tawp thlengin a do dawn tih an sawi. Union Education and Culture minister hlui Renuka Devi Borkataki pawh Gandhi-a lim sawn duh lo langsar zingah a tel. Borkotaki hi Gandhi Mandap Trust member a ni.

Hetih lai hian Guwahati East BJP MLA Sidhartha Bhattacharya chuan Gandhi-a lim sawm tur hian thurawn hrang hrang an lak hnuah thutlukna siam chauh a nih thu sawiin, kaltlangpui a nih tur thu a sawi. Hei bakah hian hi artist lar Ramkinkar Baij-a design anga sawi chu finfiahna awm lo niin a sawi bawk. Guwahati Mayor Mrigen Sarania pawhin lim sawn chu nakin zel atana thil ṭha zawk tur a nih thu a sawi ve bawk.