AP-ah sipaiin kum-tling lo pawngsual ṭhin

Arunachal Pradesh-a West Kameng district-ah naupang kumtling lo pakhat chu sipai pakhatin vawi eng emaw zat a pawngsual tih hriat chhuah a ni.

Pawngsualtu hi Indian army ami niin, a hming leh nihna erawh tarlan a ni lo a, a pawngsual ṭhin naupang hian nau thla riat mi vel a pai tih hriat chhuah a ni. West Kameng district-a thil thleng hi tun hnai khan hriatchhuah a ni a, naupang hi Assam-a Udalguri district-a cheng, Arunachal Pradesh-a hna thawka awm nia tarlan a ni. 

Kum li liam ta vel khan he naupang hian Arunachal hi a pan a, mi inah inhlawhfain a awm a ni. Tun hnai khan naupang nu leh pa te chuan Udalguri Police station-ah thubuai an ziaklut a ni. Naupang hi Udalguri Civil Hospital-ah enkawl tura dah luh zui a ni bawk.