Ruah sur nasa avangin Hmun hrang hrangah chhiatna a thleng

Tun hnaia ruah sur nasa tak avangin hmarchhak hmun hrang hrangah harsatna a thleng leh mek a, thi leh hliam eng emaw zat an awm tih tarlan a ni.

Assam : Assam-ah chuan district 33 zinga 19-te'n tuilian hi an tuar a, tuilian tuar hi mi nuai 11 vel zet an ni. Tun hnaia ruah sur nasa tak avang khan hmun hrang hrangah chhiatna a thleng a, mi 10-in nunna an chan bakah hliam tuar eng emaw zat an awm a ni. Assam State Disaster Management Authority (ASDMA) chuan tuilian avangin Kokrajhar district-ah mi paruk an thi tih an sawi a, Dhemaji-ah mi pahnih, Lakhimpur leh Morigaon district-ahte mi pakhat ve ve an thi bawk. Dhemaji, Lakhimpur, Biswanath, Sonitpur, Baksa, Barpeta, Bongaigaon, Chirang, Kokrajhar, Dhubri, South Salmara, Morigaon, Golaghat, Jorhat, Majuli, Sivasagar, Charaideo, Dibrugarh leh Tinsukia district-te chu a tuar nasa zual an ni a, heng hmuna cheng mi tam tak chu hmun him lamah sawn chhuah an nih thu an sawi.

ASDMA tarlan dan chuan Dhubri district chu tuilian tuar nasa ber niin, mi nuai 1.92 vel zetin harsatna an tawk a, mi tam takin himna zawngin in leh lo an chhuahsan a ni. Dhemaji district-ah pawh tuilian avanga harsatna tawk hi mi nuai 1.51 vel an awm a, thingtlang khaw 1,752 vel zet chu tuiin a chim a ni. Thlai chinnna hmun ram hectare nuai khat vel chu tuilian hian a chimpil bawk a ni. ASDMA chuan Dhemaji, Darrang, Chirang, Kokrajhar, Bongaigaon, Charaideo, Dhubri, Tinsukia, Sivasagar, Majuli, Sonitpur, Lakhimpur, Barpeta, Baksa, Dima Hasao, Golaghat leh Morigaon district-ahte lei chim, kawngpui chhia leh, infrastructure dang chhia report an dawn thu an sawi. ASDMA chuan Biswanath huam chhung hmun hrang hrangah leimin avangin inkalpawhna a buai phah hle tih an sawi bawk.

District 14-ah relief camp leh distri­bution centre 268 din a ni tawh a, heng hmunahte hian mi 63,797 vel an khawsa mek a ni. State Disaster Response Fund (SDRF) leh National Disaster Response Force (NDRF)-te chuan chhanchhuah hna an thawk a, mi 2,600 vel chu hmun him lamah sawn chhuah tawh an ni. Hetih lai hian Assam-a lui lian ber Brahmaputra chuan hmun tam takah hlauhawm chhinchhiahna a la pel a, Jorhat, Dibrugarh, Tezpur leh Dhubri-te chu inralring tura hriattir an ni. Brahma­putra bakah hian Burhidehing lui pawh hlauhawm chhinchhiahna chungah a la luang a, hei hian a kama awm khaw tam tak tak harsatna a thlen thei tih an tarlang.

Tuilian avang hian Arunachal Pradesh panna kawngpui pawimawh eng emaw zat chu khar lailawk a ni a, kawng­pui ṭhenkhat chu leimin avangin kaltlang theih lohin a awm mek bawk. National Highway-415-ah pawh lirthei eng chi mah a kaltlang thei lo nia tarlan a ni. Anjaw district panna kawngpui chu a pin avangin, nitin mamawh lakkhawm kawngah harsatna a thleng mek a, Dibang Valley district-a khaw ṭhenkhat chu bailey bridge chim avangin tlawhpawh theih lohin an awm bawk. Assam-ah hian kumin chhungin tuilian avanga thi mi 90 vel an awm tawh a, August 1 khan Prime Minister Narendra Modi chuan Assam hi a lo tlawh tawh a, sorkar laipuiin chhawmdawlna tur sum cheng vaibelchhe 1,000 a ruahman sak bkah, PM hian PM relief fund aṭangin cheng vaibelchhe 100 a pe bawk.

Meghalaya : Kar kalta chhunga ruah sur nasa tak avang khan Meghalaya-ah pawh harsatna hrang hrang a thleng a, nunna chan pawh eng emaw zat an awm. Meghalaya khawpui Shillong-ah chuan eucalyptus thing tluin mi pathum a delh hlum a, an zingah hian hmeichhia pakhat a tel a ni. Thing hi Raj Bhavan bula ding a ni a, Inrinni khan a tlu a ni. Nunna chan bakah hian hliam tuar mi pahnihin an awm a, lirthei pathum a delh chhe bawk. Ruah sur nasa vang hian hmun ṭhenkhatah tui a lian a, mi 800 vel chu chenna mumal nei loin an awm a ni. South leh West Garo Hills district-a khaw eng emaw zat chu tuilian hian a chim a, chhungkaw eng emaw zat chu hmun him lamah sawn chhuah an ni.

South Garo Hills district-ah chuan chhungkaw 750 vel chu chenna nei loin an awm mek a, West Garo Hills district-a Dalu Block huam chhung, Bangladesh ramri depa awm mi eng emaw zat chuan an in leh lo an chhuahsan ve bawk. State sorkar chuan relief camp paruk a din tawh a, heng hmunahte hian mi eng emaw zat chu an khawsa lailawk a ni. South Garo Hills district Police chief Abraham T. Sangma chuan hmun hrang hranga tuilian tuarte chhanchhuah hna hi Border Security Force (BSF)te chuan an thawk tih a sawi a, pawl hrang hrangte chu an che chhuak ve bawk.

Meghalaya-ah hian leimin avangin harsatna a thleng bawk a, Baghmara police station chu leimin hian a hnawl a ni. West Khasi Hills district-ah pawh leimin hian chhungkaw eng emaw zat tan harsatna a thlen a ni. Chief Minister Mukul Sangma chuan tuilian leh leimin vanga harsatna tawkte chhawmdawl hna hi ngawrh taka thawh nghal a nih thu a sawi a, district thuneitute pawh hma la tura ngen an nih thu a sawi.

Tripura : Tripura-ah pawh tun hnaia ruah sur avang khan hmun tam takah chhiatna a thleng a, nunna chan erawh an awm hriat a ni lo. State khawpui Itanagar leh a chhehvelah tuilian avangin harsatna a thleng a, relief camp 50 din a ni tawh. Meteorological department-in a tarlan dan chuan Tripura-ah hian tun hnaiah ruahtui mm 200 vel zet a tla a ni. State Emergency Response Centre-a Disaster Management chuan Howrah lui lian avangin Itanagar-ah chhungkaw eng emaw zatin harsatna an tawk a, inkalpawhna a buai phah bawk. Tuilian avanga mahni in leh lo chhuahsan hi chhungkaw 2,000 vel an awm a, a tam zawk chu Western Tripura lama chengte an ni.

Chief Minister Manik Sarkar chuan high-level meeting a ko a, harsatna tawkte chhawmdawl dan tur an ngaihtuah a ni. CM Manik Sarkar chuan district hrang hrang-a thuneitute chu an bial chhunga harsatna thleng report tur leh, theih ang anga hma la tura ngen an nih thu a sawi. Relief and Revenue Minister Badal Chowdhury chuan National Disaster Response Force (NDRF), Tripura State Rifles team leh sorkar official-te chuan chhawmdawl hna hi an thawk mek tih sawiin, chhun zan zawmin hna thawh a ni, a ti. Meteorological Department Director Dilip Saha pawhin mipuite chu chiai lo tura a duh thu sawiin, harsatna tawkte chu kawng hrang hranga chhawmdawl an nih zel tur thu a sawi ve bawk.

Hmarchhak state - Assam, Manipur, Mizoram, Arunachal Pradesh, Nagaland leh Tripura-te chuan kumin chhungin tuilian leh leimin vangin harsatna hrang hrang an tawk a, sorkar laipui chuan heng chhiatna thleng endik tur hian team a din a, chhiatna thleng hi zirchian mek a ni. State hrang hrangte hian an harsatna tawh nasat dan azirin chhawmdawlna an dawng dawn a, sorkar laipui chuan hemi atan hian cheng vaibelchhe 2,000 a ruahman a ni.