Manipur-ah venhimna tikhauh

Manipur-ah chuan Independence Day lawmna chawk buai zawnga chetna a thlen loh nan venhimna khauh zawka kalpui a ni.

Thawhlehni hian Manipur hmun hrang hrangah I-Day hi hman a ni dawn a, buaina leh harsatna thleng a awm loh nan state sorkar chuan ruahmanna a siam a ni. Security force-te chu hmun hrang hrangah insem darhin venhimna khauh taka kalpui ṭan a ni. Manipur police commando-te pawh duty tir an ni bawk. Kum dangah pawh harsatna a lo thleng fo tawh a, bomb puak leh inrikrapna a thlen fo avang hian venhimna hi khauh zawka kalpui a ni dawn tih sorkar thuchhuah chuan a tarlang.

Hetih lai hian hel pawl hrang hrang - Co-ordination Committee (CorCom), Garo Natio­nal Liberation Army (GNLA), United Libe­ration Front of Assam (ULFA) leh United People’s Liberation Army (UPLA)-te chuan I-Day hi an boycott tur thu an puang tawh a ni. CorCom hi Meitei hel pawl -United National Liberation Front (UNLF), People's Liberation Army (PLA), People's Revolutionary Party of Kangleipak (PREPAK) leh People's Revolutionary Party of Kangleipak (Progressive) inzawm khawm pawl an ni. Hel pawl hrang hrangte hian thuchhuah inṭawm an siam a, WESEA Region-ah chuan I-Day lawmna hi an boycott tur thu an sawi a, sorkar laipui leh Manipur sorkar lakah an lungawi loh thu an sawi. August 15 hian zing dar khat aṭanga zan dar 6:30 thlengin general strike an huaihawt dawn tih an sawi bawk.

General strike neih a nih dawn avang hian WESEA Region-a sorkar office, sumdawnna hmun leh lirthei chevel te khuahkhieh vek a ni dawn a, mahse hei hian emergency service, sakhaw thil leh media-te a huam lo ang.