NGT-in Assam sorkar hriattirna pe

National Green Tri­bunal (NGT) chuan Assam sorkar chu Kaziran­ga National Park (KNP) huam chhunga lirthei che vel khuahkhirh kawngah fimkhur leh zual turin a hriattir.

NGT chuan KNP huam chhunga National High­way (NH)-a lirthei che vel vangin ramsa chungah vanduaina a la thleng fo tih sawiin, Assam sorkar chu khauh zawka thupek kengkawh turin a hriattir a ni. Park huam chhunga kawngpuiahte hian lirthei tlan chak theih zawng bithliah siam a ni a, heti chunga hian lirthei che velin a sut hlum ramsa eng emaw zat an la awm a ni. Hei hi NGT chuan a ngaimawh he a, Assam sorkar chu khauh taka khapna dan lekkawh tur leh, ramsa te himna tura sensor-operated automated traffic barrier dah turin a hriattir ta a ni.

Hemi chungchangah hian Assam sorkara Additional Chief Secre­tary, K V Eapen chu NGT Chairperson Justice Swatanter Kumar hmaah a inlan a, October 10-ah a inlan leh ang. K V Eapen chuan Wildlife Institute of India (WWI) rawtna angin PArk huam chhungah kawngpuiah sensor barrier dah a nih tur thu a sawi. NH-37 hian darkar khata km 40 aia chaka tlan khap a nih thu sawiin, dan bawhchhia te chu Motor Vehicles Act hnuiah cheng 5,000 thlenga chawi tir ṭhin an nih thu a sawi bawk.