Modi-a'n Assam-a tuilian tuarte tawrhpui

Prime Minister Na­rendra Modi chuan Assam-a tuilian tuarte chu a tawrhpui thu Pathian­ni khan a sawi. Assam-ah hian tuilian avangin mi tam takin harsatna an tawk mek a, nunna chan pawh an pung chho zel a ni. Hriat theih chinah kumin chhunga tuilian vanga chhiatna hrang hranga thi zat hi mi 90 vel an awm tawh a ni.

Assam-ah hian tun hnaia ruah sur avang khan district 33 zinga 19-te'n tuilian hi an tuar leh a, harsatna tawk hi mi nuai 11 vel zet an ni. Sorkar laipui chuan tuilian tuarte chhawmdawlna tur hian ṭanpuina sum pek belh a nih tur thu a puang. PM Modi chuan Pathianni kha Assam Chief Minister Sarbananda Sono­wal chu a bia a, ṭanpuina awm thei ang angte pek an nih tur thu a hrilh a ni. Modia chuan CM hnenah hian tuilian avanga chhiatna hrang hrang thleng chu zirchiang tur leh, a theih ang anga hma lo la turin a ngen a, a tawrhpui thu a hrilh. CM Sonowal chuan PM Modi-a kaihhruai sorkarin an harsatna tawh chungchangah kawng hrang hranga a ṭanpui avangin lawmawm a tih thu a sawi a, chhawmdawl hna pawh chak taka thawh zel a nih tur thu a sawi a ni.

Chief Minister hian Pathiani khan hmun hrang hranga relief camp-te a tlawh kual a, harsatna tawk mekte chu sorkar­in theihtawp chhuaha a ṭanpui zel tur thu a sawi a ni. CM hian tuilianin Panchmile, Lakhimi Gaon leh Bogoribari lei a tihchhiatte chu siam ṭhat thuai tum a nih thu a sawi a, Kundil Bridge chu inkalpawhna kawngpui pawimawh tak a nih avangin a ang thei ang bera siam ṭhat leh a nih tur thu a sawi. Tuilian venna turin Kundil lui mawng chu laih thuk belh a ni dawn tih a sawi a, hna pawh fur zawh veleh ṭan tura ruahman a ni, a ti. Tuilian avanga lei luangral nasa lutuk veng turin Water Resou­rces Department chu hma la tura hriattir an nih thu a sawi bawk.

CM chuan kum tin tuilian avanga harsatna nasa tak an tawk ṭhin chu pawi a tih thu a sawi a, hemi sukiang tur hian hma an lak mek thu a sawi. Amarpur area-ah tuilian venna tur siam a ni dawn tih a sawi a, hei hi sorkar laipuiah pawh an thlen tawh tih sawiin, Roads and Highways Ministry chuan zirchianna an nei dawn tih a sawi. Railways thuneitute pawh a biak tawh thu sawiin, tuilian avanga rel kawng chhiate siam ṭha leh turin chak takin hma lak a ni ang, a ti bawk.