EU-in Assam leh Manipur-a tuilian tuarte ṭanpui dawn

European Union (EU) chuan Assam leh Manipur-a tuilian tuarte ṭanpuina turin euro 200,000 pek a remti.

UE palai chuan Assam leh Manipur-a tuilian tuarte ṭanpuina tura sum ruahman a nih thu hi kar kalta Zirtawpni khan New Delhi-ah a puang a, ṭanpuina a pek tur hi India pawisa chuan cheng 15,052,000 a ni. Heng ṭanpuina sum te hi state pahniha tuilian tuar chhungkaw 25,000-te'n an chhawr thei dawn a ni. European Civil Protection and Humanitarian Aid Operations (ECHO), South Asia Regional Office-a an hotu David Sevcik chuan, "India hmarchhaka Assam leh Manipur state-te'n tuilian avanga harsatna nasa tak an tawk hi a pawi kan ti hle a, kan tawrhpui zia lantir nan leh an intunnun lehna turin EU chuan ṭanpuina sum hi pek a remti a ni" a ti. David Sevcik chuan EU thawhpui Indian Red Cross Society (IRCS) chuan tuilian tuarte chhawmdawl hna hi an lo thawk tawh a, mi eng emaw zat chu chhawmdawlna pek an lo ni tawh tih a sawi bawk.

EU ṭanpuina sum hmang hian tuilian tuar nasa zual, Assam-a Karim­ganj, Nagaon, Dhubri leh Barpeta-a chhungkaw eng emaw zat chhawmdawl an ni dawn a, Manipur-a Imphal West, Imphal East, Thoubal leh Bishnupur district-a chengte pawh ṭanpuina hi pek an ni ang. Ṭanpuina hi EU-a Disaster Relief Emergency Fund (DREF) aṭanga pek chhuah a ni ang. Tarlan dan chuan Assam leh Manipur-a tuilian avang hian nunna chan mi 100 vel an awm a, tuilian tuar hi maktaduai 1.7 vel awmin, thlai chinna hmun ram hectare 100,000 vel a tichhe bawk a ni.