Hmarchhak hmun hrang hrangah I-Day lawm a ni

India-in Independence a hmuh champha phak vawi 70-na chu hmar­chhak state hrang hrangah lawmna buatsaih a ni.

Hmarchhak state - Assam, Arunachal Pra­desh, Nagaland, Sikkim, Tripura, Meghalya, Manipur leh Mizoram-ahte I-Day lawmna hi neih a ni a, thil thleng duhawm loh lian tham a awm lo nia tarlan a ni. Kumin I-Day-ah hian hel pawl eng emaw zat chuan buaina chawhchhuah an tum nia hriat a nih avangin venhimna pawh khauh taka kalpui a ni. Manipur-ah chuan hel pawl hrang hrang inzawm khawm Coordination Committee (CorCom) chuan I-Day hi an boycott tur thu an lo puang tawh a, total bandh huaihawt an tum bawk avangin venhimna pawh khauh taka kenkawh a ni. Assam-ah chuan August 13 aṭang khan a a lawmna hi buatsaih ṭan a ni a, zirlaite tan intihsiakna hrang hrang buatsaih a ni a, nimin khan lawmman sem nghal a ni. State dangah pawh I-Day hi ropui taka lawm a ni.

Hetih lai hian Assam-ah chuan tuilian avangin mi tam takin harsatna an tawk a, Dhubri district-a Naskara Lower Primary School-a zirtirtu leh zirlai naupangte chuan tuilian karah India puanzar zahna chibai an buk a, ngaihven a hlawh hle. Naskara Lower Primary School hi tuilian chuan a chim a, mahse I-Day vawi 71-na pualin school kawtah India Flag zar a ni a, hemi zahna lantir hian chibai an buk a ni. Tun hnaia ruahsur nasa taka vang khan Naskara Lower Primary School hi khar a ni a, mahse he school-a head master Tazem Sikder leh zirtirtu dang Nripen Rabha, Joydev Roy leh Mizanur Rahman bakah pawl thum zirlai mi pathumte chuan India hnam hla 'Vande Mataram' chu sain India Flag zahna hi an lantir a ni.