Manipur sorkar kutah hel mi 68 inpe

Manipur-a hel pawl hrang hrang aṭangin mi 68 chu state sorkar kutah an inpe a, an ralthuam an hlan nghal bawk.

Chief Minister N. Biren Singh-a kaihhruai sorkar chuan Thawhṭanni khan Imphal-ah 'Homecoming Ceremony' a buatsaih a, he hunah hian hel mi leh sa te hian an ralthuam te dahṭhain sorkar kutah an inpe a ni. He huna thusawitu Chief Minister chuan, hun rei tak chhung an in leh lo chhuahsan a rawlrala che ṭhin ten an rilru lamlet a, sorkar belh lehna chang an hria chu a lawmawm takzet a, sorkar chuan thinlung takin a lo lawm a, khua leh tui ṭha tak ni zui turin a beisei a ni, a ti. Hetih rual hian sorkara rinna nghata inlamlet te hi sorkar chuan kawng hrang hrangah an hamṭhatna tur a ngaihtuah sak tur thu a sawi bawk.

Biren Singh chuan tun hma lama 'surrender policy' lo siam tawh te chu a hlawhchham niin a sawi a, policy hi ennawna siam ṭhat a ngaih thu a sawi. BJP kaihhruai sorkar chuan hemi siamṭha tur hian hma a la mek a, tunah hian Surrender cum Rehabilitation Policy duan fel a ni tawh a, Ministry of Home Affairs pawmpuina nghah mek a nih thu a sawi. Sorkar laka helte chu ram danpui chuan an dikna chanvo a humhalh sak tlat tih sawiin, an chhungte nena an khawsak ho leh theih nan te, khua leh tui ṭha tak an nih leh theih nan te kawng a hawn sak reng a ni, a ti.

Manipur sorkar kuta hel inpe te hi Kangleipak Communist Party (KCP) mi leh sa 23, United National Liberation Front (UNLF) 17, People's Revolutionary Party of Kangleipak (PREPAK) 10, PREPAK (Pro) 7, People's Liberation Army (PLA) 7, Kanglei Yawol Kanna Lup (KYKL) mi leh sa pali te an ni. Sorkar kuta hel inpe mi 68 zingah hian hmeichhia pali an tel a ni.