Ram himna turin kan beizel dawn : Modi

Prime Minister Narendra Modi chuan India Independence Day vawi 71-na puala thu a sawi­naah, ram himna chu NDA sorkar-in a ngaihpawimawh ber a nih thu a sawi. Modi chuan India leh China sipaite Dokalam-a an inep chungchang sawiin, "India chuan a ram mipuite himna a ngaipawimawh ber a, ram mipuite himna turin a bei zel dawn a ni" a ti.

Tun hnai khan sorkar laipui chuan China ramri depa awm hmarchhak state - Sikkim leh Arunachal Pradesh-ahte sipai tam zawk a dahbelh nia tarlan a lo ni tawh bawk. Sipai dahbelh chungchang hi kar kalta Zirtawp ni khan sorkar official pakhat chuan a sawi a, hei hi Sikkim-a India leh China inrina Dokalam-a ram pahnihte inkar boruak ṭhat loh vang a nih thu a tarlang. China chuan Dokalam-a kawngpui siam hi duhtawk mai loin, ramriah hian lei dawh a tum leh mek niin media-te chuan an tarlang.