Assam : Tuilianin KNP ram 85% chim tawh

United Nations Educational, Scientific and Cultural Organization (UNESCO)-in World Heritage site-a a puan, Assam-a Kaziranga National Park (KNP) ram zau zawng 85% zet chu tuilianin a chim tawh.

KNP Divisional Forest Officer Rohini Ballav Saikia chuan Thawhṭanni thleng khan Park area tam zawk chu tuilian hian a la chim tih a sawi a, tuiin a chim hi a ram zau zawng 85% zet a nih thu a sawi. KNP ram zau zawng hi sq km 430 zet a ni a, a ram hi zau hle mah se Brahmaputra lui bul hnaia awm a nih avangin kumtin tuilian avangin harsatna a thleng ṭhin a ni. Kum 2016-a tuilian khan KNP ram 80% vel zet chu a lo chim tawh a, ramsa leh nungcha eng emaw zat an thih phah a ni. Kumina tuilianah pawh hian eng emaw zat an thi leh tawh a, offical-te chuan ramsa thi zat hi 100 chuang a nih tawh thu an sawi.

KNP-a ramsa eng emaw zat chu an himna tur ngaihtuahin Panbari-a Wildlife Rehabilitation and Conservation Center-ah sawnchhuah an ni.

Park bulhnaia khaw hrang hrang 57-a mi 78,000-te chu hmun him lamah sawnchhuah an ni a, mi pahnihin nunnna an chan tawh bawk. KNP bakah hian Morigaon district-a Pobitora Wildlife Sanctuary pawh tuilian hian a chim nasa hle a, ramsa thi pawh eng emaw zat an awm tawh tih, forest department official-te chuan an sawi. Pobitora-ah hian ramsa chi hrang hrang 5,000 vel an khawsa mek a ni.

Hetih lai hian National Green Tribunal (NGT) chuan Assam sorkar chu Kaziranga National Park (KNP) huam chhunga lirthei che vel khuahkhirh kawngah fimkhur leh zual turin a lo hriattir tawh a ni. NGT chuan KNP huam chhunga National Highway (NH)-a lirthei che vel avangin ramsa chungah vanduaina a la thleng fo tih sawiin, Assam sorkar chu khauh zawka thupek kengkawh turin a ti a, ramsa te himna tura sensor-operated automated traffic barrier dah turin a hriattir bawk.