Assam : DGP-in Muslim pawlte meeting neihpui

Assam Director General of Police, Bhaskar Jyoti Mahanta chuan state chhunga madrasas enkawltu, Islamic organisation hrang hrangte meeting a neihpui a; madrasas enkawl dan te, an sum tuak dan te, hmun dang aṭanga imam kalte register dan leh thil dang pawimawhte a sawipui.

Chief minister Himanta Biswa Sarma chuan state dang aṭanga imam kal turte tan kaihhruaina, standard operating procedure (SOP) siam a nih thu a lo sawi tawh a ni.

Chief Minister chuan, "State dang aṭanga sakhaw thil buaipui leh, zirtirna pe tura imam lo kal turte tan kaihhruaina kan siam a, local police station-ah imam chanchin chu zirchian phawt niin, hemi hnuah registration an tihna turin sorkarin portal a siam ang," a ti.

DGP hoa meeting neihah hian Jamiat Ulema-e-Hind, Ahl al-Hadji, Ahle Chunnat Jamaat leh Nadwa Toh Tameri Sanghatana hruaitute pawh an tel. Heng palite hi Assam-a madrasas hrang hrangte zirchiang turin thla ruk hun pek an ni. Zirchianna neih zawhah, Assam sorkar chuan madrasas enkawl dan turah dan leh kaihhruaina te a siam dawn a ni.

Mahanta chuan Al-Qaeda in India Subcontinent (AQIS) firfiak pawl chu Assam-a hmun tam takah an inkhuar tawh a, Islamic society pawhin heng mite dapchhuah an nihna turah sorkar pawh ṭha takin a thawhpui zel a ni, a ti.

Assam-ah hian AQIS member 30 chuang man an ni tawh a, heng mite hi madrasas-ahte man an ni. An zinga panga chu Bangladesh mi an ni bawk.

BJP kaihhruai Assam sorkar hian Assam-a sorkar enkawl madrasas 600 chuang a khar tawh a, hetih lai hian NGO madrasas 800 vel a la awm mek a ni.