Assam-ah sorkar laka helna thubuai ziahluh a tam ber

National Crime Records Bureau (NCRB) data tihchhuaha a landanin, kum riat liam ta chhungin Assam chu sorkar laka hela puhna, sedition case ziahluh tamna ber state a ni.

Kum riat chhunga ram puma sedition case ziah zinga 14.52% chu Assam state-ah ziahluh a ni. Kum 2014 aṭang khan India ram pumah sedition case 475 ziah luh niin, heng zinga case 69 chu Assam-a mi a ni.

Sedition case hi Indian Penal Code (IPC)-a Section 124A hnuaiah ziahluh a ni ṭhin.

Assam dawtah Haryana chu case ziahluh tamna state niin, case 42 an nei. Jharkhand leh Karnataka-ah case 40 leh 38 ziahluh a ni bawk.

UT zingah Delhi chu sedition case ziahluh tamna ber niin, kum 2014 aṭang khan case ziahluh hi 13 an nei.

Kum riat chhung hian hmarchhak-a Meghalaya leh Mizoram state-ah sedition case ziahluh a awm lo a, India ram state zinga sedition case awm lohna state awmchhun an ni.