Tripura : CM thlak hnu pawhin hmasawnna a awm lo : CPI-M

Tripura chief minister hlui, Communist Party of India-Marxist (CPI-M) hotu Manik Sarkar chuan an state-a BJP sorkara chief minister chu thlak a nih hnuah pawh, sorkar hnathawh kawngah hmasawnna engmah hmuh tur a awm lo niin a sawi.

Kumin May thla khan central lama BJP hruaitute chuan Tripura chief minister atan hian Manik Saha an ruat a, Biplab Kumar Deb a thlak a ni.

Manik Sarkar chuan, "Sorkar hnathawhna kawng hrang hrangah Chief Minister thlak hian danglamna engmah a thlen lo," a ti. CM thar a awm hnuah pawh an state chhung politics dinhmun chu a chhe zual tih a sawi.

Pathianni khan CPI-M chuan BJP kaihhruai sorkar chu ṭhalaite sorkar hna leh hnathawh tur dang pea a insawi chungchangah dawt sawiah an puh bawk. BJP sorkar chuan state mipuite chu thu dik lo hmangin an rilru a hruaikawi sak niin an sawi. CPM-M leader leh finance minister hlui Bhanu Lal Saha chuan Left Front sorkar khan sorkar hna thawk a la hnem zawk daih niin a sawi bawk.