Assam CM-in tuilian tuarte chhawmdawlna pek thuai tiam

Assam Chief Minister Sar­bananda Sonowal chuan an state chhunga tuilian avanga harsatna hrang hrang tawk te chu darkar 48 ral hma ngeia chhawmdawlna pek a tiam.

Chief Minister chuan he thu hi Thawhlehni-a Independence Day lawmnaah a sawi a, tuilian avanga chhiatna hrang hrang tuartute chu a tawrhpui thu a sawi. Nunna chan chhungte chu a tawrhpui takzet tih sawiin, hliam tuarte pawh dam leh thuai turin duhsakna a hlan a, harsatna tawk te hnenah hian darkar 48 ral hma ngeiin chhawmdawlna pek a nih tur thu a sawi a ni. Sonowal chuan chhiatna thleng chu dan theih ni lo mah se inven theih a nih thu sawiin, hemi kawngah hian chak zawka hma lak tum a ni, a ti bawk.

Assam-ah hian tun hnaia ruah sur nasa tak avangin tui a lian leh a, districty 25-a mi nuai 30 chuang vel a ngawng a ni. Nunna chan pawh mi 20 vel an awm leh a, I-Day lawmna inkhawmah tarlan a ni. Dhemaji, Lakhimpur, Biswanath, Sonitpur, Darrang, Baksa, Nalbari, Barpeta leh Bongaigaon-te chu a tuar nasa zual an ni a, chhiatna thleng pawh a nasa hle. Hetih lai hian upper Assam-a Dhemaji district pawh tuilian hian a nghawng nasa hle a, mi nuai khat vel zetin harsatna an tawk a ni.

Tuilian avang hian National Highway 37-ah lirthei tlan a mumal thei lo a, hei hian Upper leh Lower Assam inkalpawhna pawh a nghawng a ni. NH-37 hi Nagaland panna kawngpui pawimawh a nih bawk avangin a nghawng hi a lian hle a, lirthei eng emaw zat chu kawng lakah an tangkhang a ni. Defence thupuangtu chuan tuilian avanga harsatna tawkte chhawmdawl hna hi Gajraj Corps-te chuan an thawk tih a sawi. Bungraw thiar kual vel nan leh relief camp-a awmte nitin mamawh sem chhuahna atan Indian Army-te chuan an lirthei eng emaw zat an thawh bawk a ni.

Northeast Frontier Railway chief public relations officer (CPRO) Pranav Jyoti Sharma chuan tuilian avang hian rel ser­vice eng emaw zat chu tihtawp lai­lawk a nih thu a sawi. Railway Board chuan hmarchhak pan tur rel te chu nimin theng khan cancel a la nih thu a sawi a, khaw awm dan azirin hun rei zawk pawh cancel a ngaih mai theih thu a sawi.

State Disaster Response Fund (SDRF) leh National Disaster Response Force (NDRF)-te chuan chhanchhuah hna hi an thawk bawk a ni. Chhanchhuah hna thawh nan hian lawngte 232 vel hman a ni a, mi 14,000 chuang vel chu hmun him lamah sawn chhuah tawh an ni. Assam Disaster Management Authority (ADMA) chuan Brahmaputra lui chu Guwahati, Nimatighat, Tezpur in Sonitpur, Goalpara leh Dhubri-ahte hlauhawm chinchhiahna chungah a la luan avangin mipuite chu fimkhur turin an chah a ni. Tuilian hian Kaziranga National Park, Pobitora Wildlife Sanctuary leh Lawkhua Wildlife Sanctuary-te pawh a chim tawh a, ramsa eng emaw zat chu hmun him lamah sawn chhuah tawh an nih thu an tarlang.

Hetihlai hian Prime Minister Narendra Modi chuan Assam-a tuilian tuarte chu chhawmdawlna pek chhunzawm zel an nih tur thu a sawi. Modi chuan Assam CM Sonowal chu biain an state-in harsatna nasa tak an tawk zui zel chu pawi a tih thu leh a tawrh­pui thu a sawi. Hetih rual hian sorkar laipui chuan harsatna tawkte hi a thlahthlam dawn lo tih sawiin, ṭanpuina pek zel an nih tur thu a hrilh. Modi chuan Assam-a tuilian tuarte a tawrhpui th hi Twitter-ah pawh a tarlang a, sorkar laipuiin theihtawp chhuaha a ṭanpui tur thu a sawi.