Manipur-ah buaina lian awm loin I-Day hmang

India Independence vawi 71-na chu ram chhung hmun hrang hrangah Thawhlehni khan lawm a ni a, Manipur-ah pawh buaina lian tham awm loin hman a ni.

Manipur-ah hian hel pawl hrangten I-Day hi an boycott avangin venhimna pawh khauh taka kalpui a ni. Director General of police L.M. Khaute chuan Independence Day lawmna chawkbuai zawnga chetna thleng report an dawn thu sawiin, hmun hnihah bomb a puak tih a sawi a, thi leh hliam erawh an awm lo a ni. Imphal-ah pawh bomb leh puak thei thil dang eng emaw zat man a nih thu sawiin, he thila inhnamhnawiha puh police pahnih pawh man niin, thu zawhfiah an ni. Hel pawl hrang hrang - Co-ordination Committee (CorCom), Garo National Liberation Army (GNLA), United Liberation Front of Assam (ULFA) leh United People’s Liberation Army (UPLA)-te chuan I-Day hi an boycott a ni. CorCom hi Meitei hel pawl -United National Liberation Front (UNLF), People's Liberation Army (PLA), People's Revo­lutionary Party of Kangleipak (PREPAK) leh People's Revo­lutionary Party of Kangleipak (Progressive) inzawmkhawm pawl an ni. I-Day boycott avang hian WESEA Region-a sorkar office, sumdawnna hmun leh lirthei chevel te khuahkhirh vek a ni.

Chief Minister N. Biren Singh chuan Rifles parade ground-ah hnam puanzar pawt pharhin parade contingent-te a chhanglet a ni. CM chuan buaina leh harsatna awm loa ralmuang taka India-in zalenna a hmuh champha lawm a ni chu lawmawm a tih thu a sawi.