District tinah women police station dah a ni dawn : Meghalaya CM

Meghalaya Chief Minister Mukul Sangma chuan hmeichhiate laka sualna pung zel tur venna turin district tinah women police station dah a nih tur thu a sawi.

Independence Day lawmna inkhawmah he thu hi Chief Minister chuan sawiin, hmeichhiate laka hleihlenna thleng ṭhin chu kumtin a pun chhoh thu a sawi a, hemi veng tur hian women police station din a nih tur thu a sawi. CM chuan hmechhia mai bakah naupangte chungah hleilenna leh inrikrapna a hluar chho hle tih a sawi a, hemi do let tur hian theih­tawp chhuah a hun takzet a ni, a ti. State sorkar chuan ruahmanna hrang hrang siamin hma a la a, a hlawhtlin theihna turin mipuiten an thlawp ṭhat a pawimawh thu a sawi bawk.

Meghalaya-ah hian district eng emaw zatah women police station hi din a ni tawh a, district pali-ah din tura hma lak leh mek a ni. State sorkar chuan hmeichhia te chunga hleihlenna leh, thubuai ziahluhte ngaihtuah bik turin women police station hi din belh zel a tum a ni. Police-te'n an tarlan danin Bangladesh ramri depa khaw hrang hrangah hmeichhia leh naupang chunga hleihlenna hi a hluar a, mihring hmanga sumdawnna pawh a hluar a ni. Hetih rual hian ralthuam leh ruihhlo tawlhruk pawh a hluar hle a ni.