Sikkim standoff : China hotuin Nepal a tlawh

Chinese vice premier Wang Yang chuan Thawhṭanni khan Nepal khawpui Kathmandu a thleng a, ni thum chhung a cham ang. Media-te chuan Chinese vice premier Wang Yang hian India leh China-te'n ramria buaina an tawh mek chungchang chu Nepal sorkar hruaitute a sawipui dawn niin an tarlang.

Chinese vice premier hian India ram ṭhenawm, Pakistan chu zalenna a hmuh champha phak pualin a tlawh a, Independence Day vawi 70-naah khuallian a ni. Pakistan aṭang hian Wang Yang hian Nepal a pan leh nghal a, ni thum a cham chhungin sorkar mi pawimawh hrang hrang meeting a neihpui dawn a ni. Media-te chuan China hotu hian India nena Dokalam-a an buaina tawh mek chungchang chu a thupui ber pakhat tur niin an sawi. A cham chhung hian Nepal Prime Minister Sher Bahadur Deuba, Deputy Prime Minister K B Mahara, Nepal Bidhya Devi Bhandari president-te pawh a kawm dawn a ni.

Hetih lai hian Nepal hi China leh India chungchangah a inrawlh duh lo nia tarlan a ni. Nepal Deputy Prime Minister K B Mahara chuan, "China leh India inkarah hian inrawlh kan tum lo a, ṭan lam leh ṭan loh lam pawh kan nei lo. Ram pahnihte hian inbiakna hmangin an buaina hi chingfel se Nepal chuan a duh a ni. Nepal hian hmasang aṭang tawhin ram pahnihah hian awn lam a nei ngai lo a, tunah pawh hei hi a la ngai reng a ni" tiin a sawi. Tun hnaia China, Bhutan leh India inrina Dokalam-a China leh India sipaite inkara boruak duhawm lo thleng chu pawi a tih thu sawiin, chinfel thuai a duh thu a sawi bawk.