Arunachal-a lei chimah zirlai 21-in hliam an tuar

Arunachal Pradesh-a Lower Dibang Valley district-ah lei chim avangin zirlai 21-in hliam an tuar a, Chief Minister Pema Khandu chuan he thil thleng hi pawi a tih thu leh, hliam tuarte a tawrhpui thu a sawi.

Lower Dibang Valley district-a Jamupani suspension bridge chim chhan hi tarlan a ni lo. Chief minister chuan Thawhlehni-a vanduaina thleng hi a hriat veleh a tawrhpui thu a sawi a, district thuneitute chu hma la nghal turin a hriattir bawk. Hliam tuar zingah hian zirlai bakah zirtirtu pawh an tel a ni. Indian Air Force helicopter chu vanduaina thlenna hmunah hian tirh nghal a ni a, hliam na zual mi 11-te chu Aditya Hospital panpui nghal an ni a, hliam tuar dangte pawh hi Dibrugarh panpui an ni. Hliam tuar zinga pakhat chu a dinhmun a ṭha lo hle nia tarlan a ni bawk.

MLA Mutchu Mithi leh district thuneitute chuan vanduaina thlenna hmun hi an tlawh nghal a, a hmunah thil awmdan an enfiah a ni. Police, Army, IAF, BRO leh Medical team-te pawh an che chhuak ve nghal a, theih ang angin chhanchhuah hna an thawk nghal a ni. CM Khandu chuan he vanduaina hian a ṭawng takzet tih a sawi a, hetih lai hian chanchin hre hmasaten a hmun an pan nghal chu lawmawm a tih thu a sawi. He chhiatna thleng avanga nunna chan an awm lohna turin theihtawp chhuah a nih tur thu leh, state sorkar chuan hliam tuarte inenkawlna chu a tumsak tur thu a sawi.

Hetih lai hian Tezu-a Potom Market Complex-ah pawh Nilaini zing khan kangmei nasa tak a chhuak a, eichawp dawr pathum, hardware dawr pahnih, computer leh Xerox, musical instrument zawrhna leh zu zawrhna dawr bakah puanṭhuina dawr pakhat a kang a ni. Indo Tibetan Border Police leh Indian Army-te chuan chhanchhuah hna an thawk a, hliam tuar zat hriat a la ni lo. Chief Minister chuan kangmei chhuak avanga hliam tuarte leh bungraw tam tak chan te chu a tawrhpui thu a sawi a, kangmei chhuah chhan hi chhuichian a nih tur tu a sawi.