Tui lian vangin Assam-ah rel service titawp lailawk

Assam-ah tuilian avangin inkalpawhna eng emaw zat khar a ni a, Northeast Frontier Railway (NFR) chuan rel service pawh tihtawp lailawk a nih thu an puang.

NFR chuan rel serive 70 vel zet chu cancel a nih thu tarlangin, eng chen nge rel service hi tihtawp a ngaihdawn an hriat loh thu an sawi. Railway Board chuan zonal railways chu Assam aṭanga Malda (West Bengal) leh Katihar (Bihar) pana tlan ṭhin rel te chu August 20 thleng titawp rih turin a hriattir. NFR official-te chuan Guwahati station-ah khualzin tangkhang 100 chuang an awm tih sawiin, heng mite hi railway thuneitute chuan an awmna tur an ngaihtuah sak tih Nilaini khan an sawi. Ruah a sur loha tui a kam chak chuan rel service hi dan pangngaia kalpui leh thuai theih an inbeisei thu an sawi a, mipuite chu an harsatna tawh hrethiam turin an ngen bawk.

Assam State Disaster Management Authority (ASDMA) tarlan dan chuan, Nilaini thleng khan tun hnaia ruah sur vanga tui rawn lian leh avang khan mi 39 an thi tawh a, April - June thla chhung khan mi 84 an lo thi tawh bawk a ni. Assam-ah hian kumin chhungin tuilian leh a kaihhnawiha thi mi 123 an thi tawh a ni. Tuilian tuarte chhanchhuah hna hi Indian Army leh Border Security Force bakah National Disaster Response Force (NDRF) leh State Disaster Response Force (SDRF) official-te'n an thawk a ni.

ASDMA official-te tarlan dan chuan district 24-a mi 33,45,442 chuan tuilian hi an tuar a, khaw 2,970 zet chu tuiin a chim a ni. Nilaini thleng khan mi 1,38,648 velin harsatna an la tawk a, relief camp 304-ah mi eng emaw zat an la khawsa bawk. Chief Minister Sarbananda Sonowal chuan Thawhlehni khan tuilenna hmun hrang hrangte a tlawh a ni. Chief Minister hian Independence Day lawmna inkhawma thu a sawinaah tuilian tuarte a tawrhpui thu a lo sawi tawh a, darkar 48 ral hma ngeia chhawmdawlna pek an nih tur thu a sawi bawk.