Manipur-ah People’s Day hmang

Manipur-ah BJP kaih­hruai sorkar a din hnuin mipuiten sorkar-a hotute awlsam zawka an dawr theih nan People’s Day hman ṭhin a ni a, Nilaini khan an state khawpui Imphal-ah pawh hman leh a ni.

People’s Day hi Chief Minister Secretariat-ah neih a ni a, mi 1,500 velin Chief Minister N. Biren Singh an dawr a ni. Zing dar 9 aṭanga chawhnu dar 2:30 thleng hun hawn a ni a, hetih chhung hian complaint 350 chuang thehluh a awm a, mi 1500 velin hmaichhanah CM hi an dawr bawk. Biren Singh chuan complaint eng emaw zat a lut chu lawmawm a tih thu sawiin, a theih ang anga bawhzui a tiam. Hetih lai hian sorkar Department ṭhenkhat chuan complaint an dawn te hi an bawhzui ṭha tawk lo niin a sawi a, People’s Day hi ṭangkai taka hman chhunzawm zel a nih theih nan Department tinte chu chak zawka hma la turin a ti bawk.

Chief Minister chuan thuthar thehdartute hma­ah, August 10 leh 15-a People’s Day a hman theih loh chhan chu ram pawn lamah programme a neih vang tih a sawi a, mipuite hriathhiamna a ngen bawk. Manipur sorkar chuan thla tin People’s Day hi ṭum khat hman ziah turin ruahmanna a siam a, hmun hrang hrangah People’s Day hi hman a lo ni tawh a ni.