Chakma leh Hajong-te chhawmdawlna pe turin AP ngen

Union DoNER ministry chuan Arunachal Pradesh sorkar hnenah an state chhunga Chakma leh Hajong 65,875 awm mekte chu lockdown puan vanga chhawmdawlna a pek zingah telh turin a ngen. 

DoNER Ministry Joint Secretary Rambir Singh chuan AP chief secretary Naresh Kumar hnenah lehkha thawnin, Delhi based rights group, Rights and Risks Analysis Group (RRAG) director Suhas Chakma chuan AP-a Chakma leh Hajong hnam awmte chuan lockdown chhungin ei leh inah harsatna an tawk tih sawiin, prime minister hnenah inrawlh turin a ngen tih a hrilh. 

Hei hi sorkarin hri leng vanga hnathawk thei loa hun rei tak inkharkhipna kalpui a nih hnua chhawmdawlna a pekte zinga telh an nih ve loh vang niin Singh chuan RRAG director lehkhaah tarlan a nih thu a sawi.