Nagaland NPP-in Covid-19 chhiah lak tihtawp phut

National People's Party (NPP) Nagaland state committee chuan state sor­karin petrol leh diesel-a Covid-19 chhiah a lak chu titawp turin a ngen. 

Hripui leng vanga state-in sum lama harsatna a tawh mek sutkianna kawng khat atan Nagaland sorkar chuan April 28 zanlai aṭang khan petrol leh diesel-a chhiah a lak chu a tipung a ni. 

Chhiah lak tihsan hi pawl  leh party hrang hrang pawhin a hmain an lo sawisel tawh a ni. 

Nagaland state NPP chuan thuchhuah siamin, hri leng vanga mipuiten harsatna chi hrang hrang an tawh mek laia sorkarin chhiah a lo la hi thil tihawm lo tak leh mipuite dinhmun ngaihtuah pui loh vangah a puh. State economy tuaithar dan tur leh mipuite phurrit sutkian dan ngaihtuah lo la, an harsatna belhchhahna tur siamsak chu thil awm lo tak a ni tiin an thuchhuahah hian an tarlang. 

NPP chuan dawrkai ṭhenkhatin dik lo takin bung­rua an chheprelh niin an sawi a, hetianga thil an tih avang hian thil man pawh a sang chak hle tih an sawi. Sorkar lam thuneitute thil man chungchang hi an enzui ṭhat loh avangin dik lo taka thiltihna hi a thleng a, mipuiten an tawrh phah a ni, a ti.