Congress-in Assam CM-te nupa CBI chhui tir an phut

Congress party chuan Assam chief minister Himanta Biswa Sarma leh a nupui, Riniki Bhuyan Sarma-te chu eirukna kaihhnawihah Central Bureau of Investigation (CBI) chhui chian tir an phut.

New Delhi-a Jantar Mantar-a lungawi lohna lantir a nih hnuah, Assam Congress hian CBI hnenah memorandum an thehlut a ni.

AICC general secretary Jairam Ramesh chuan , "Assam lama kan thawhpuite chuan case pasarihah Assam CM hi CBI chhuitir an phut a ni. Himanta Biswa Sarma hi BJP lam aṭangin malsawmna dawng nasa viau mah se, a tih dik lo finfiahnate a lang zel a ni. CBI hi an hna thawh tir phalsak an ni dawn em," tiin a sawi.

CBI hnena memorandum an thehluhah hian thu dik tak hailan a ni a, thil dik lo titute chunga action lak a nih ngei theihna atan CBI chu rang taka hma la tura an ngen thu an tarlang a ni.

Congress party hian Amingaon, North Guwahati-a Vandya Internation School chu CM nupui, Riniki Bhyan Sarma ta a nih thu sawiin, a dintu pawh Assam Chief Minister a nih thu a sawi a ni, an ti. State pakhat hotu lu berin international school a enkawl theih dan chu an zawt bawk. Private company, RBS Realtors chua Assam CM chhungkaw ta, firm leh company hrang hrangah sum ṭhahnem tak an transfer thu Congress party chuan an tarlang bawk. Company-a all-time director, Ashok Dhanuka chu tun hnaia BJP-in Jharkhand MLA-te a lei tumnaah pawh a inrawlh a ni, an ti. RBS Realtors-in Kolkata aṭanga sum a transfer kual dan chu CBI chhui chian tir an phut thu an sawi.

Assam-a dik lo taka ram inleisakna lian ber thlengah Assam CM hi a inhnamhnawih nia puh bawkin, Congress party chuan hemi chungchang hi CBI-in a chhui chian a ngai a ni, an ti. Hei bakah hian puantahtute bumna lian tak a thleng a, 'Golden Thread Company' chuan silk leh Muga chu puantahtu hnen aṭang lawm uchuaka leisakin, man sang takin an hralh chhuak leh bawk niin an sawi.

Covid-19 hri leng hluar laia Assam sorkarin PPE kits tam tham tak a lei danah, dan leh kaihhruaina siamte bawhchhiat a ni a, hemi chungchang pawh hi chhui chian a ngai tih Congress chuan an sawi bawk a ni.