Nagaland-in Teachers Attendance Monitoring System hman tum

Nagaland chuan an state-a zirna siamṭhatna tura hmalakna kawng khat leh, zirtirtu aikal la ṭhinte dapchhuahna turin Teachers Attendance Monitoring System hman an tum dawn tih chief minister Neiphiu Rio chuan a sawi.

Thawhṭannia Capital Cultural Hall-a Zirtirtute Ni lawmna puala private leh gorvenment sector-a zirtirtu leh zirlai pungkhawmte hmaa thu a sawinaah CM chuan hei hi a sawichhuak a ni.

An system hman tum chu World Bank programme peng pakhat a nih thu sawiin, he system hian zirtirtu zinga dik lo taka thilti a, aikal lak ṭhin a tihtawp bakah, zirtirtute attendance pawh a ṭhat phah dawn a ni, a ti. Department of School Education (DoSE) chuan aikal la ṭhin sorkar hnuaia zirtirtute chu a enliam mai mai dawn lo tih a sawi bawk.

State chhunga sorkar school hrang hrangte beisei ang an pha lo ṭhin chu pawi a tih thu CM chuan a sawi a, School Education Department hnenah pawh sorkar school-a zirtirtuten private school-te an tluk leh, anni aia an tihṭhat theih zawk dante ngaihtuahpui turin a ti bawk a ni.