AP-a sorkar school hrang hrang cheiṭhat hna 2030-ah zo dawn
Arunachal Pradesh chief minister Pema Khandu chuan an state chhunga sorkar school zawng zawng chei leh thuam ṭhat hna chu kalpui mek niin, thuamṭhat ngaite chu kum 2030-ah zawhfel vek hman tum a ni tih a sawi.
Chief Minister chuan, "National Education Policy hnuaiah, Arunachal Pradesh sorkar chuan school building ṭha tawk lote a thuam ṭha vek dawn a, zirna ṭha zawka kalpui a nih theihna turin zirlai leh zirtirtute mamawh facility-te pawh pek an ni ang. School thuam ṭhat hna hi kalpui mek niin, a tahtawlin thawh chho a ni ang," a ti.
Pema Khandu chuan an state-a sorkar school leh goverment-aided school 3,600 awm mekin, zirtirtu 16,000 an awm tih a sawi. School ṭhenkhata zirtirtu indaihlohna awm nia complaint awm ṭhin chu, zirtirtute hi rualkhai taka school-ah dah an nih chuan an la indaih tawk hle a ni, a ti bawk. Hemirual hian state sorkar chuan state public service commission kaltlanga zirtirtu ṭhahnem tak lak tharna tur a pawm tih a sawi.
Education Department chu zirtirtu transfer leh posting chungchang mumal taka kalpui tura tiin, hemi kawngah hian department chu ṭha taka thawhpui turin Arunachal Teacher's Association (ATA) pawh a ngen bawk a ni.