Arunachal-ah India leh China sipaite an inep lo : India

Ministry of Defence (MoD) chuan thuchhuah siamin, hmar­chhak state Arunachal Pradesh-a India leh China sipaite an inep nia sawi chu thu dik lo a nih thu a tarlang.

Defence official chuan, “Arunachal-a India leh China sipaite inep anga tarlan hi thubelh chian dawl lo leh finfiahna awm lo a ni a, he thu hi khawi aṭanga lo darh nge hriat a ni lo” a ti. Indian Army leh People’s Liberation Army-te inkarah buaina chhuak a awm lo a, India-in zalenna a hmuh champha Independence Day lawmna pawh, China ramri depa awm hmar­chhak state hrang hrangah boruak ralmuang tak hnuaiah hman a nih thu a sawi. Official chuan, “I-Day hi border area-ah pawh boruak muanawm tak hnuaiah hman a ni a, ramri-a duty Indian Army leh People’s Liberation Army-te pawhin inṭhianṭhatna lantir nan sweet-te pawh an inpe tawn a ni. Hetiang tho hian Sikkim-a Doklam-ah pawh ram pahnih sipaite chuan induhsakna lantir nan eitur an inpe tawn a ni” a ti.

Hetih lai hian India leh China sipaite hi Doklam Plateau-ah thla hnih vel zet an lo inep tawh a, a tu zawk zawk mahnin tawlhkir an tum rih lo. June thla tir khan India chuan Doklam-ah hian China sipaite dang turin sipai eng emaw zat a tir a ni. China chuan helai hmunah hian inkalpawhna kawngpui a sial a, hei hi India chuan duh loin, China sipaite hnathawh titawp turin sipai a tir a ni. China chuan India chu a sipaite hnukkir turin a hriattir a, mahse India chuan helai hmuna kawngpui sial hi a remtih loh thu leh, China sipaite chu dan zel an nih tur thu a sawi. Ram pahnih inkar boruak hi a sosang hman hle a, ramriah hian sipai an tirhbelh ve ve a ni.

An buaina hi inbiakna hmanga chingfel turin hma lak ni ṭhin mah se tun thlengin a la hlawhtling thei lo. Ram pahnih sipai aiawhte chuan ‘Flag Meeting’-te pawh an lo nei tawh a, mahse hei hian rah ṭha a chhuah chuang lo. Ram pahnihte hi Doklam bakah Ladakh leh Pangong Lake area-ah pawh an innghirngho chho leh mek niin media-te chuan an tralang a, finfiahna erawh a awm lo. Pangong Lake area-ah hian Indian Army leh Indo-Tibetan Border Police-te chuan China sipaite chu lo dangin, an innawr buai deuh a ni. China sipaite hian Finger Four leh Finger Five post an tih aṭangin Indian ram chhunga rawn luh an tum a, sipaite hi iron rod, lung leh hmanraw dang nen an thawk chhuak. Ram pahnih sipai zinga mi pathum vel ve vein hliam an tuar bawk nia tarlan a ni.

Hetih lai hian China pawhin a sipaiten India ram luh an tum anga tarlan chu phain, sipaite chu Ladakh leh a chhehvela an chet loh thu a sawi. Chinese Foreign Ministry thupuangtu Hu Chunying chuan, “Hemi chungchangah hian information kan dawng lo a, China-India border-ah buaina chhuak a awm kan hre lo. China chuan India chu Line of Actual Control (LAC)-a a sipaite hnukkir turin a hriattir a, ram pahnih sipaite inkarah buaina chhuak report kan dawng lo” a ti. Hetih rual hian Doklam Plateau-ah erawh ram pahnihte an inep ngei thu Chinese Foreign Ministry thupuangtu chuan a pha lo a, hmun dangah erawh buaina thleng a awm loh thu a sawi.

Defence Ministry chuan Doklam-a sipai tirh an nih chhan chu, helai hmuna China sorkarin inkalpawhna kawngpui a sial vang a nih thu sawiin, hei hi Bhutan sorkar pawhin a duh lo hle a ni, a ti. Hetih rual hian China chuan Doklam-ah hian India chuan inrawlhna chhan tur a nei loh thu leh, a sipaite pawh a rang thei ang bera hnukkir turin a vau a ni.