Assam : Tuilian avanga nunna chan an punbelh zel

Assam-a tuilian chuan zia­awm pan loin zual lam a pan a, nunna chan pawh tun hnaiah mi 10 chuang an awm leh nia tarlan a ni.

Assam State Disaster Management Authority (ASDMA) tarlan danin tun hnaiah tuilian avang hian mi 10 chuang an thi leh a, Ningani thleng khan tuilian vanga nunna chan hi mi 49 an awm tawh a ni. Hei hi July thla hnua tui rawn lian ṭha leh bika nunna chan an ni a, April leh June thla inkar pawh khan mi 80 chuang an lo thi tawh bawk. ASDMA chuan tun hnaiah ruah nasa taka a sur leh avangin district 33 zinga 24-te chuan tuilian an tuar leh mek tih sawiin, harsatna tawk hi mi nuai 30 vel an tling tawh niin a tarlang. District 24-a khaw 2,584 chu tuiin a chim tawh a, thlai chinna hmun ram hectare nuai 2 chu tuilian hian a chimpil tawh bawk.

Hemaji, Sonitpur, Barpeta, Dhubri, South Salmara, Morigaon leh Nagaon district-ahte tun hnaia khan mi 10 vel an thi leh a, chin hriat loha awm eng emaw zat an la awm bawk. Mi 1,01,0135 vel chu relief camp 235-ah semdarh an ni a, chenna tur nei lo mi eng emaw zat an awm bawk. Chief Minister Sarbananda Sonowal chuan tuilian avanga hun rei tak chhung harsatna an tawk chu pawi a tih thu sawiin, chhiat tawkte a tawrhpui takzet tih a sawi. Hetih rual hian district hrang hranga thuneitute chuan a tul anga chhanchhuah hna an thawh thu sawiin, chhun zan zawmin hna thawh a ni, a ti. An harsatna tawh hi a namai lo hle tih sawiin, chhanchhuah hna thawk tur hian Indian Army leh Border Security Forces-te ṭanpuina pawh dil a nih tawh thu a sawi. National leh State Disaster Relief Forces bakah mi tlawmngaite hnathawh tichak turin hma lak zel a nih tur thu a sawi a, nunna chan an punbelh zel tawh lohna turin hma lak zel a ni dawn a ni, a ti bawk.

Chief Minister hian an harsatna tawh mek chungchang sorkar laipuiah thlen turin Nilaini khan New Delhi a pan a, Prime Minister Narendra Modi bakah sorkar mi pawimawh eng emaw zat a dawr a ni. Ningani khan Assam tuilian chungchang ngaihtuah hian high offial meeting neih a ni a, he hunah hian Sonowal hi a tel a ni.

Assam-ah hian tuilian venna turin Brahmaputra Expressway project kalpui a ni dawn a, September thla aṭang hian thawh ṭan tura ruahman a ni. Mithiamte chuan Sadiya aṭangin Brahmaputra lui laihkhuar belh hna hi thawh a ni dawn tih an sawi a, hemi atan hian dredger panga ruahman a nih thu an sawi. Thla thar aṭangin project hi kalpui ṭan tum a nih thu sawiin, Border Roads Organisation chuan heng hmunah te hian sand leh silt hmangin kawngpui siam hna an lo thawk nghal dawn bawk. Hemi atan hian Assam sorkar chuan sorkar laipuiah pawh detailed project report a thehlut thuai dawn nia tarlan niin, state sorkar chuan Brahmaputra Board pawh a dinfel tawh a ni. Project kalpui nan hian cheng vaibelchhe 237 ruahman a ni.