CPI-M-te'n CM thlavang hauhin lungawi lohna lantir

Tripura-a rorel lai Communist Party of India-Marxist (CPI-M) chuan, Chief Minister Manik Sarkar-a'n India Independence Day puala a thusawi tihchhuah a ni lo chu pawi an tih thu an sawi. Hemi duh lohna lantir leh, CM thlavang hauhin Zirtawpni khan lungawilohna an lantir.

Chief Minister Manik Sarkar-a'n I-Day puala a thusawi record sa chu national media lian pahnih - All India Radio (AIR) leh Doordarshan Kendra (DDK)-te chuan siamṭhat a nih loh chuan an tichhuak thei lo tih an sawi a, I-Day puala thuchah hi siamṭhat a nih loh avangin tihchhuah a ni lo. He thil hi CPI-M-te chuan an dem thu an lo sawi tawh a, kar kalta Zirtawpni khan All India Radio (AIR) leh Doordarshan Kendra (DDK) office kawtah lungawi lohna hi an lantir ta a ni. CPI-M-te chuan central-a rorel lai Bharatiya Janata Party (BJP) chu he thilah hian inrawlhah an puh a, Prasar Bharati chu a thuneihna hmanga thununah an puh bawk.

Rorel lai CPI-M hruaitute chuan BJP kaihhruai sorkar chetdan chu, India rama emer­gency puan a nih laia media-te thunun an nih ang mai kha niin an sawi. CPI-M Central Committee member Gautam Das chuan, "BJP chet dan hi kum 1975 chhoa British-in media zawng zawng a thunun ang mai kha a ni a, a demawm takzet a ni. BJP hian India ram chu political party pakhat thuneihna hnuaia awm tir a tum a ni" tiin asawi.

Hetih lai hian AIR leh DDK-te chuan I-Day puala Chief Minister thusawi hi August 12 khan record a nih thu an sawi a, mahse a thu­sawiah hian mipui hnena puan­zar rem lo eng emaw zat a awm avangin a thusawi hi paih ṭhen emaw, siamṭhat emaw a nih loh chuan an tichhuak thei lo tih an sawilawk tih an tarlang. Chief Minister thusawi hi siam ṭhat a nih loh avangin August 15-a I-Day lawmnaah khan a thusawi hi AIR leh DDK-te hian an tichhuak lo tih an sawi. Hetih rual hian Manik Sarkar chuan kum 19 chhung zet chief minister a nih chhungin a thusawia siamrem ngai khawp a la awm ngai lo nia sawiin, AIR leh DDK-te thutlukna chu democracy palzutna leh ram danpui bawhchhiatna a nih thu a sawi.

Tripura-a hian CPI-M kaih­hruai Left Front sorkar chuan Chief Minister thusawi pek­chhuah loh duh lohna lantir hian state pumah nawrh huaihawt an tum thu an lo sawi tawh a ni.