Meghalaya HC-in thing kit lo turin hriattir

Meghalaya High Court chuan khawpui chhunga mihring tana hlauhawm theia ngaih thing eng emaw zat kit tura hmalakna awm mek chu tawpsan turin state sorkar a hriattir.

Chief Justice Dinesh Mahe­shwari leh Justice V P Vaish-te chuan thupek hi an tichhuak a, state sorkar chu khawpui chhunga thing kit lo turin a ti. Hei bakah hian khawpui chhunga thing ding, mihring tana hlauhawm a awm a, kih a ngai a nih chuan forest officer-te'n court an hriattir a ngaih bakah, affidavit siam a ngaih thu an sawi bawk. Meghalaya sorkar chuan tun hnaia vanduaina a thlen hnu khan Shillong khawpui chhunga thing ding lai, 550 vel chu kit turin hma a la a, survey pawh a kalpui a ni.

Tun hnai khan ruah sur nasa tak avanga Raj Bhavan bula thing ding tlu chuan mi pathum a delh hlum a, hliam tuar an awm bawk. He thil thlen hnu hian state sorkar chuan Shillong khawpui chhunga mihring tana hlauhawm leh chhiatna thlen theia ngaih thing ding 500 vel chu kih a nih theih nan hma a la a ni. Hemi chungchangah hian High Court-ah petition thehluh a ni a, Court chuan sorkart hmalakna hi tawpsan tur leh thing pawh kit lo turin thupek a chhuah ve leh ta a ni. Sorkar advocate P Agarwal chuan vanduaina a thlen hma hian Raj Bhavan leh a bul vela thing dingte chu June thla khan endik a lo nih tih a sawi a, mihring tana hlauhawm a awm lo tih a sawi. August 12-a thil thleng khan vanduaina vang liau liu niin a sawi bawk.

Hemi chungchang hi August 23 khian High Court hian a ngaihtuah leh dawn a ni.