Sikkim-a bus chesualah mi pali an thi

Sikkim Nationalised Transport (SNT) bus chu kar kalta Ningani khan a chesual a, a hmunah mi pali an thih bakah, midang 40-in hliam an tuar a ni.

North Sikkim district-a Ambi­thang-ah bus hi chesualin, kawngpui aṭangin meter 300 vel a lum a ni. Mita hmutute chuan SNT bus driver hian motor dang lehpelh a tumna lamah kawngsirah a tlan liam zui ta tih an sawi. Bus hi North district-a Mangan pana tlan a ni a, chetsualna thlenna hmun hi Sikkim khawpui Gangtok aṭanga km 70 vela hla a ni.

Vanduaina thlenna hmun hi Indian Army leh state police-te chuan an pan nghal a, chhanchhuah hna an thawk nghal a ni. Hliam tuar mi 40-te hi Gangtok-a damdawi-in hrang hrang panpui an ni a, hliam tuar zingah hian bus khalhtu pawh a tel a ni. Chief Minister Pawan Chamling chuan hliam tuarte hi tlawh kualin, an inenkawlna senso chu sorkarin a pek tur thu a sawi. Chief minister hian thi chhungte chu cheng nuai 2 ṭheuh a hlan nghal a, hliam tuarte pawh an inenkawlna turin cheng 50,000 ṭheuh a hlan nghal bawk. State Transport Minister D T Lepcha leh SNT official-te chuan Chamling hi an ṭawiawm a ni.