Congress-in madrasa ṭhiah a nih dan chhui chian phut

Assam-a Congress party chuan BJP kaihhruaiin Bongaigaon-a Islam sakhaw zirna hmun, madrasa a ṭhiahtir dan chu chhui chiang turin National Commission of Minorities (NCM) an ngen a, madrasa-a zirlai 224-te tan dik taka ro rel sak turin an ngen bawk.

NCM chairperson Iqbal Singh Lalpura hnena lehkha an thawnah, Congress MP Abdul Khaleque leh MLA - Pradip Sarka, Abdur Rashid Mondal, Asif Nazar leh Abdul Batin Khandakar-te chuan, Bongaigaon-a Markazul Ma-Arif Quariayana Madrassa ṭhiahsak a nih danah state sorkar chuan dan loin thil a ti niin an sawi.

August 30 khan Bongaigaon district magistrate-in order tichhuakin, a tuk August 31-ah madrasa hi tihchhiat a ni. Order-ah hian madrasa hian campus pakhat huam chhunga building eng emaw zat sa tur leh, activity hrang hrang kalpui theihna tur document pawimawhte a nei lo nia tarlan a ni. Hei bakah hian building-te hi PWD-in kaihhruaina a siam anga sak a nih loh avangin mihring tan pawh a him tawk lo niin a sawi bawk.

Congress hruaitute chuan district thuneitu hian madrasa-a awm, zirlai 224-ten an insawnna tur ngaihtuahna hun pawh a pe lo nia sawiin, an zinga a tam zawk chu kum tling lo an la ni, an ti. Zan laiah zirlaite hian an awmna hi an chhuahsan a ngai a, hmun hla tak tak aṭanga kalte an nih avangin innghahna tur pawh an nei lo tih an sawi. Hetianga zirlai, lehkha an zir ve theihna tur khapsak an nih hi dan kalh, mihring laka rawng taka chetna a nih thu lehkha an thawnah hian an tarlang.

NCM chu he thil thleng chungchangah hian inrawlh a, zirlaite dinhmun pawh ngaihtuah sak turin a ngen bawk. August thla vek khan Barpeta leh Morigaon district-ah madrasa pakhat ve ve chu sorkarin a lo ṭhiahsak tawh bawk.