Meghalaya : NIA-in HNLC hotu lakah charge sheet ziak lut

National Investigation Agency (NIA) chuan Meghalaya-a helpawl, Hynniewtrep National Liberation Council (HNLC) hotu, Bobby Marwein leh mi dang pathumte lakah nikuma Star Cement factory staff quarters-a bomb tihpuah chungchangah charge sheet an ziak lut.

Shillong-a special NIA court-ah charge sheet hi ziah luh a ni tih Thawhlehni zana NIA thuchhuah chuan a tarlang.

Kum 2020, December 13-a East Jaintia Hills district-a Star Cement factory staff quarters-a bomb puak chungchang chhui hna hi nikum March 15 aṭang khan NIA hian a la a ni. NIA chuan an chhui chiannaah, HNLC self-styled finance-cum-socio-cultural secretary Marius Rynjah-a'n chhiah pe tura a phut chu Star Cement Ltd neitu hian a pek duh loh avangin, HNLC helte hian bomb hi an tipuak ta niin a sawi.

HNLC hian Meghalaya chu Khasi hnam bil thuneihna hmun atana siam duhin an bei a, pawikhawihna hrang hrang an thlen hnuah sorkar laipui chuan helpawlah a puang a ni.