UN palaiin Suu Kyi a hmuh theih loh chuan Myanmar tlawh tum tawh lo

United Nations special envoy on Myanmar Noelen Heyzer chuan Myanmar sipai sorkarin civil hruaitu an paihthlak tak, Aung San Suu Kyi-i hmuh a phalsak dawn loh chuan Myanmar tlawh a tum lo tih a sawi.

Singapore mi Noeleen Heyzer chuan Myanmar ram mipui tam tak chu himna zawnga an tlanchhiat a la ngai ngei dawn a ni tiin, mipuite ṭanpui leh chhawmdawlna pe tur hian ram dangte a ngen.

ISEAS-Yusof Ishak Institute-in Singapore-a seminar a buatsaiha thu a sawiah, Heyzer chuan Myanmar rama boruak muanawm a awm chhoh a, civil rorelna a din leh theihna turin UN hmalakna chu theihtawpa thlawp a ṭul thu a sawi. Myanmar-a stakeholder hrang hrangte chu a biakpawh a ngai a, Suu Kyi-i pawh a hmuh tel a ngai a ni, a ti.

Kum 77 mi, Suu Kyi-i hi nikum February thlaa sipaiten civil sorkar thuneihna an hnehchhuh hnuah pawn chhuak thei loin hren zui a ni a, thla liam ta khan an ram khawpui, Naypyitaw-a military base-a hmun pakhatah sawn nia sawi a ni. Tun thlengin a awmna tak hi sipai lam hian a la puangzar lo.

Thubuai hrang hrang siamsak niin, heng zinga eng emaw zatah hian thiam loh chantir a ni tawh bawk. Thiam loh chantir a nihna ṭhenkhatah hian kum 20 tang tura hrem a ni tawh a, kar hmasa khan kum 2020 inthlanpuia dik lo taka thiltia puh a nih chungchangah, hrehawm taka kum thum tang tura hremna pek belh leh a ni.