Meghalaya-a tuilian tuarten ṭanpuitu an au

West Garo Hills, Meghalaya-a tuilian tuar mi tam takte chuan sorkarin chhawmdawlna a pe ṭha lo nia sawiin, ṭanpuina pe chhuak thuai tura an phut thu an sawi.

West Garo Hills-a Bhaitbari, Rajabala leh Phulbari area-a cheng chhungkaw 300 vel chuan chhawmdawlna hi an dawng lo tih an sawi. Tuilian tuarte chhuan chhawmdawlna an dawng ṭha lo hle tih sawiin, kar kalta chhung khan riahna mumal pawh nei loin an awm tih an sawi. Tuilian tuar zinga mi Motleb Ali chuan, “Tuilianin kan in leh lo a chimpil vek avangin riahna tur kan nei lo a, zan nga zet chu kawngpuiah kan riak a ni. Heti chung hian chhawmdawlna mumal pek kan ni lo” a ti. Chhungkaw eng emaw zat chu nitina inhlawhfa chawp an nih avangin an harsatna tawh hi a namai lo hle tih sawiin, sorkar chu an harsatna sukiang thuai turin an phut tih a sawi bawk.

Abdul Hussain pawhin, "Chenna tur kan nei lo a, Agia - Mankachar - Phulbari - Tura (AMPT) road-ah camp 200 vel kan siamchawp a, helai hmunah hian mi 1,500 vel kan khawsa mek a ni. Ei tur kan nei lo a, tui thianghlim leh inthiarna mumal pawh awm loin kan khawsa a ni” tiin an harstna tawh chu a namai lo hle tih a sawi. Local activist Mostafa Kabir chuan helai hmuna tuilian tuarte hian ei leh in an tlachham niin a lo sawi ve mek bawk a, chhawmdawlna pek an nih thuai loh chuan an nunna atan a pawi thei dawn niin a sawi. Heng lai hmuna awmte hi chhungkaw harsa tak tak an nih avangin an dinhmun hi a ṭha lo hle niin a sawi a, ṭanpui an ngai takzet a ni, a ti. Kabir chuan tuilian danna siam tur hian sorkarah rawtna vawi eng emaw zat an lo thlen tawh tih sawiin, tun thlengin hmalakna a la awm lo chu mak a tih thu a sawi bawk.

West Garo Hills bialtu assembly speaker Abu Taher Mondal leh MLA Ashahel D. Shira-te chuan tuilenna hmun hi an lo tlawh tawh a, mahse hmalakna mumal a awm zui lo nia tarlan a ni. All Meghalaya Minority Students Union president Nur Islam chuan, “Sorkar hotute chuan tuilian avanga harsatna tawkte an tlawhkual a, chhawmdawlna pek an nih tur thu an sawi ṭhin. Mahse hei hi tihhlawhtlin a nih ṭhin loh avangin harsatna hi a thleng ṭhin a ni” tiin sorkar chu mawhphurtu a nih thu a sawi bawk. Kum 2014 khan West Garo Hills-ah hian tuilian avangin mi 100 chuangin nunna an lo chan tawh a ni.