Meghalaya sorkarin C-train project kalpui tum

Meghalaya sorkar chuan khawpui chhunga lirthei tawt lutuk tihziaawmna turin Caterpillar Train (C-train) service tir turin project a kalpui dawn nia tarlan a ni.

Urban Affairs Minister, Ronnie V Lyngdoh chuan lirthei tawt lutuk tihziaawmna tur hian ruahmanna hrang hrang siam a lo ni tawh ṭhin tih sawiin, mahse hengte hian lirthei pung chak lutuk avangin awmzia an nei lo a, tunah chuan thiamna sang zawk hmangin motor kawngpui chungah rel tlan tir turin hma lak a ni,a ti. C-train project hi zirchian leh a la ni dawn a, state sorkarin a pawm a, a taka kalpui a nih chuan India rama a hmasa ber tur a ni ang, a ti. State sorkar ruahmanna te chu sorkar laipuiah thlen a nih tur thu a sawi bawk.

Minister Ronnie V Lyngdoh chuan he project kalpui tur hian sorkar laipui leh US sorkar chu thawhpui an tum tih sawiin, thiamna sang tak hmanga duan a nih avangin a hautak dawn hle a ni, a ti. Hetih rual hian project hi sorkar laipuiin a pawmpui a, a hlawhtling thei a nih chuan India rama a hmasa ber tur a ni dawn a, a phurawm hle dawn a ni, a ti. State capital Shillong chu mihring leh lirthei pungchak lutuk avangin a chep tawh hle tih a sawi a, kawngpui zauh tur pawhin tihngaihna a awm tawh meuh lo a, tunah chuan ngaihtuahna dang sen a ngai a, hei hi state sorkar pawhin a bawhzui mek a ni, a ti.

Indian Railways engineer, Ashwani Kumar Upadhyaya (47) chuan kum 2016 khan Caterpillar Train siam kawnga a thawh hlawk avangin award a lo dawng tawh a ni.