Manipur sorkarin Sangai himna ngaipawimawh

Manipur Forests and Environment Minis­ter Thounaojam Shyam­kumar chuan state animal, sangai chu an mang mai lohna turin hma a la tih sawiin, an himna an ngaihpawimawh thu a sawi.

Minister Shyamkumar chuan sangai-te chu mang mai thei dinhmuna ding an nih thu sawiin, humhalh bik ngai an nih thu a sawi. State animal an nihna mai bakah, ramsa vang tak mai an nih avangin state sorkar chuan an mang lohna turin hma a la mek a ni, a ti. Keibul Lamjao National Park chu sangai awm tamna a nih avangin chei ṭhat leh tihchangtlun a a ngai tih sawiin, hemi tur hian hma pawh lak mek a nih thu a sawi.

Manipur-ah hian tun­hnai khan “Con­serva­tion of Sangai in Manipur for State Legislature, Adminis­trator and the Media” tih thupui hmang­in workshop buatsaih a ni a, he hun hi minister chuan khuallian niin a hmanpui a ni. He workshop hi Forest Department leh Wildlife Institute of India, Dehradun ṭangkawp ten an buatsaih a ni a, he hunah hian sangai chanchin zirbinga hun hman a ni.